DG Olderico Lopes Reprezenta SECoop Loke Abertura “Formasaun Teknika iha Area Integridade, Inspesaun, Auditoria no Investigasaun”, iha Railaku, Municipio Ermera
Railaku, 15 Abril 2024
Diretor Geral Eng. Olderico Lopes Reprezenta Secretario de Estado de Cooperativas (SECoop) Loke Abertura “Formasaun Teknika iha Area Integridade, Inspesaun, Auditoria no Investigasaun”, iha Posto Administrativu Railaku, Municipio Ermera (Salaun CCT-NCBA Ermera). Formasaun ida nee organiza husi Diresaun Geral Inspesaun Auditoria (GIA) nebe Lidera husi Sr. Gaspar Policarpo Correia.
No tuir Presidente komisaun organizadora Sr. Gaspar Policarpo Correia, katak partisipasaun husi formasaun nee husi Funsinariu SECoop iha Nivel Nasional no Municipio ho Mane hamutuk 36, Feto 27 ho Total hamutuk ema nain 63. Formasaun nee halao iha durante loron lima nia laran, nebe komesa husi Segunda-Feira 15 to 19 Abril mak foin remata. Ho formador nebe mak mai husi Komisaun Anti Korupsaun (KAK), Providoria Direitus Humanus no Justisa (PDHJ), Ministeriu Finansa, Komisaun Funsaun Publika (CFP) no Ministeriu Solidariedade Sosial no Inkluzaun (MSSI).
Iha serimoria Abertura nee, reprezentante Komisaun Funsaun Publiku Sr. Agapito da Concenção iha ninia diskursu fo lia menon ba partisipantes formasaun no Komisaun organizadora formasaun katak Diresaun Geral Inspesaun Auditoria (GIA) ninia papel importante mak labele hatene deit mak buka funsinariu sira nia sala maibe hatene mos halo prevensaun liu husi kapasitasaun ka formasaun sira, Atu nunee bele garantia governasaun ida nebe mos no Integridade.
Iha fatin hanesan husi Diretor Geral Eng. Olderico Lopes katak formasaun nee atu prepara kada partisipantes ho didiak atu sai servidor ida nebe diak nebe bazeia ba tema nebe hakerek iha Spanduk.
“Formasaun ida nee atu prepara imi nia an didiak hodi nunee bele sai servidor ida nebe diak no bazeia ba tema nebe iha nee, pontos hirak nebe mak importante tebes ba funsinariu sira konaba oinsa atu kontrola no monitoriza aktividades SECoop, atu nunee prosedimentu no regra nebe halao nee, lao tuir duni ninia dalan”,Tenik DG.
Nia hatutan, iha formasaun durante loron lima nia laran nee sei bele fo benefisiu ba partisipantes sira. No liu husi formasaun ida nee mos atu apoiu ba planu governu nian nebe mak atu halao desentralizasaun ba poder local. No iha durante nee SECoop iha ninia forsa minimu maibe halao ona destakamentu ba funsinariu iha munisipio 13, atu nunee bele prepara an ba desentralizasaun poder local nian,”hakotu nia. Iha Serimonia Abertura nee hetan partisipasaun husi Reprezentante Komisaun Funsaun Publiku, Reprezentante Presidente Autoridade Municipio Ermera, Reprezentante Komandante Polisia Nasional Timor-Leste no Xefi Suku.
