“ITA RASIK TENKI ORGULLU NO SAI NAIN BA PRODUTU NE’EBÉ MAKA DURANTE ITA PRODUZ”.
Covalima, 27 Maiu 2024, Sua Eselénsia Secretário de Estado de Cooperativas (SECoop), Eng. Arsénio Pereira da Silva, M.Agr., hala’o lansamentu ba tetu no sosa produtu Batar no Fos (Bafo) Kayrala hosi membru Kooperativa Multi-Sektoriál Movimentu Kamponezes Timor-Leste (MOKTAIL) sira nian, iha Aldeia Besak Oan, Suku Maudemo, Postu Administrativu Tilomar, Munisípiu Covalima.
Programa IX Governu nian liu-liu hosi Secretaria de Estado de Cooperativas nian katak halo produsaun Bafo Kayrala atu halo panifikasaun katak produz sai pão, bolinus, sasoro, dose, no selu-seluk tan hodi fornese ba Komunidade no estudante sira.
“Saida maka ita produz ida ne’e maka ita tenki orgullu, senti sai nain ba saida durante ne’e ita halo, ba hau orgullu tebes. Ohin iha fatin ida ne’e ita sei tetu no sosa Bafo kayrala hosi produtór sira hodi transporta ba sentru MOKATIL iha nasionál hodi halo prosesamentu sai Bata Fos no fariña, depois maka oferese ba merenda eskolar, tanba Bafo Kayrala mos tama ona iha menu merenda eskolar reprezenta karbohidrat hamutuk ho produtu lokal sira seluk” hateten SECoop bainhira hala’o Lansamentu ba sosa no tetu Bafo Kayrala iha Tilomar, iha loron 27 Maiu 2024.
Governante ne’e mos komprometidu katak sei Asume resposavelidade hodi buka merkadu ba produtor sira, merkadu ida maka sei fornese Bafo Kayrala ba merenda eskola, , maka SECoop fó apóiu ba MOKATIL liu hosi traferénsia públiku hodi sosa produtu bafo kayrala ne’ebé produs husi membru koperativa sira, hafoin diversifika sai ai han nutritivu atu koresponde ba demanda Merenda eskolar.
Iha fatin hanesan Sekretariu Jeral MOKATIL Munisípiu Covalima, Elias Agustinho informa produtu Bafo Kayrala ne’ebé maka MOKTIL Nasionál sosa kada kilograma ho folin sentavus tolu nulu resin hitu ($ 0,37) husi kustu ne’e kada membru na’in ida kontribui sentavus rua ba kaderneta koperativa nian.
Iha tempu hanesan mos to’os na’in Arminda Martins, senti kontenti tanba Bafo Kuda ne’ebé maka sira kuda ne’e ikus iha duni rejultadu.
“Kontente tebes ho ami halo Bafo Kayrala ida ne’e, hetan osan husi kosar ben rasik. ohin ha’u hetan $ 309 ho kilograma 885, folin agora kada hetan 37 sen, ha’u hetan deit 309 tanba 7 dolar ko’a ba iha kaderneta koperativa nia” Arminda esplika.
Iha Covalima MOKATIL Prepara rai hamutuk hektares 334 maibe iha tinan ne’e hahú husi fulan janeiru to’o maiu foin utiliza hektares 160 ho membru grupu iha ema na’in 2000 resin hodi fo kontribuisaun ba produsaun Bafo Kayrala iha Covalima.
