Gleno, 05 Abril 2024, Sua Eselénsia Secretário de Estado de Cooperativas (SECoop), Eng. Arsénio Perereira da Silva, M.Agr., hamutuk ho Secretário Munisípiu Ermera ba Asuntu Administrasaun no Finansas, José da Costa Gomes, Reitor East Timor Café Institutu (ETCI), Mateus de Jesus, Prezidenti CU ROHALIK, Mario Madeira Soares inklui membru Cooperativa sira hala’o lansamentu Kuda Bafo Kayrala hamutuk hektares ha’at iha Gleno.

Antes halo lansamentu kuda Bafo Kayrala Sua Eselénsia vizita uluk ba edifísiu Cooperativa Créditu Union Rai Hamutuk Osan Liberta Kiak (CU ROHALIK) hodi halo reuniaun ho dirijenti Cooperativa sira, rona sira nian progresu dezenvolvimentu no dezafiu sira ne’ebé durante ne’e hasoru.

Iha reuniaun ne’e Prezidente CU ROHALIK, Mario Madeira Soares relata katak total rai ne’ebé maka sira hamutuk hektares 4 no estudante sira hosi ETCI parte departamentu agrikultura nian sei halo peskiza produtu Bafo Kayrala ne’e rasik.
“CU ROHALIK prontu nafatin atu koopera ho entidade sira hotu, liu-liu parte SECoop no Ministériu Agrikultura Pekas, Pekuáriu no Floresta, ho ida Kooperativa disidi kuda Bafo Kayrala hamutuk hektares haat, kompostu hosi hektar ida ho balun iha Kampus ETCI nia kotuk no hektares rua ho balun iha Fatuqueru.
Ita agradese ba programa Sua Eselénsia nian tomak liu programa Produsaun no hortikultura, CU ROHALIK prontu koopera no servisu hamutuk, liu hosi atividade sira ne’e hotu maka ita Dezenvolve rai doben Timor-Leste, hodi hasa’e produsaun agrikula nune’e bele asegura siguransa alimentar iha rai laran.

Instituisaun ETCI liu Departamentu Agrikultura prontu kooperativa atu halo peskiza ba prudutu Bafo Kayrala nian kona-ba ninia nutrisaun saúde ema no animal nian” afirma Prezidenti CU ROHALIK.
Entretanu CU ROHALIK harii iha loron 9 Fulan Outubru 2022, ho ninia membru inisía hamutuk ema nain 36 no kapital hamutuk dollar rihun tolu resin, progresu ba membru agora dadaun sa’e ona, hamutuk ema nain 289 inklui Sua Eselénsia SECoop rasik ho kapital $78.863 dollar amerikanu.

Iha vizita ne’e Sua Eselénsia SECoop aprésia ho dezenvolvimentu CU ROHALIK nian no agradese ba dirijenti Cooperativa sira tanba iha inisiativa rasik hodi prepara rai atu kuda Bafo Kayrala, parte ida hodi kontribui ba hasa’e kresimentu ekonomia rai laran nian.
“Agradese wain tebes tanba bele simu hau nia ekipa, inisiativa diak tebes, bele kolabora ho programa Secretaria de Estado de Cooperativas nian iha IX Governu Konstitusionál, Governu hanesan regular, fasilita no apóiu tuir kbiit SECoop nian” afirma SECoop.

Iha oportunidade ne’e mos Governante ne’e esplika esplika benefísiu hosi produtu Bafo Kayrala ne’e rasik ba dirijenti Cooperativa sira.
“Ita hotu hatene katak seitor Cooperativa ne’e importante tebes hamutuk seitor rua sira seluk hanesan seitor públiku no privadu ne’ebé maka konsagra iha konstituisaun RDTL artigu 138. Programa SECoop nian iha IX Governu konstitusionál nian foka ba kooperativa produsaun agrikula ho ninia produtu prima maka “kommodity” Bafo Kayrala, produtu refere sai hanesan materia prima ba industrializasaun, ninia hun ida ita bele produz ba prudutu final hamutuk 30 resin, inklui mos ita bele kultiva iha kualker fatin no kualter tempu, lahare ba tempu udan no bailoron,” hatutan SECoop.

Iha vizita ne’emos Sua Eselénsia SECoop aproveita oportunidade ne’e hodi rejistu membru foun CU ROHALIK ba 289, antes ne’e mos sai ona ba CU ADORADA iha Postu Administrativu Tutuala, CU Roman Nicolao Lobato Fahilebo, Postu Administrativu Bazartete, CU Estrela iha Pante Makasar, ne’e hanesan jestu ida hodi motiva komunidade sira atu involve movimentu Cooperativa sira iha teritóriu laran tomak.

Prezensa iha seremónia ne’e maka hanesan, Reprezenta PNTL Munisípiu Ermera, Xefe Suku Lauala inklui funsionáriu SECoop sira destakadu iha Munisípiu Bobonaro no Liquisa.

#Mídia SECoop#