SEKoop Halo Abertura Formasaun Bázika Ba Grupu Sira Iha Postu Administrativu Laleia

Laleia, 11 Juñu 2025

Iha kuarta-feira dadeer, Sua Eselénsia Sekretáriu Estadu Kooperativa (SEKoop), Eng. Arsénio Pereira da Silva, M. Agr., halo abertura formasaun ba Grupu Rai no Empresta Osan husi Suku Lifau, Hatu-Ralan no Kairui, iha Postu Administrativu Laleia.

Formasaun ne’e ho objetivu atu fasilita grupu sira ne’ebé maka durante ne’e forma ona husi ajénsia World Vision Timor-Leste (WVTL) atu nune’e sira bele transforma-an sai kooperativa, nune’e bele iha sustentabilidade ba iha futuru, hodi sai fonte rendimentu ba uma-kain membru sira nian no kontribui ba kresimentu ekonomia rai laran.

Iha abertura ida ne’e, Sua Eselénsia SEKoop husu ba formandu sira atu partisipa ho didi’ak iha formasaun durante semana ida nian laran, atu nune’e bele jere ho di’ak sira nia grupu bainhira transforma-an sai Kooperativa tuir dekretu-lei kooperativa haruka.

“Agradese ba World Vision, ba sira nia inisiativa hodi sai parseiru ho Governu. Sekretaria Estadu Kooperativa sei fasilita grupu tarjetu sira ne’e, hodi hetan formasaun bázika kona-ba lala’ok kooperativa nian, hodi bele transforma-an sai kooperativa, nune’e bele iha ninia sustentabilidade ba futuru. Bainhira sai ona Kooperativa no adkiri ona nia legalidade no estatutu própriu, difisil atu naksobu,” afirma SEKoop.

Sekretáriu Estadu Kooperativa kontinua enkoraja formandu sira atu kuriozu hodi kontinua husu pergunta, hodi explora liu-tán informasaun no matenek sira atu nune’e bainhira remata tiha formasaun ida ne’e bele implementa ho di’ak iha jestaun kooperativa bainhira estabelese ona.

Formandu sira mai husi grupu hamutuk tolu ho totál ema na’in 35. Formasaun bázika ne’e sei hala’o durante semana ida nia laran, hahú husi loron 11 to’o 17 Juñu 2025, iha Salaun Parokiál Laleia, Munisípiu Manatuto.

Iha serimónia abertura ne’e marka prezensa husi reprezentante WVTL, Administradór Postu Administrativu Laleia no reprezentante Komandante PNTL Laleia.

Média SECoop