SEKoop Realiza Seremónia Hasa’e Bandeira Nasionál no Husu Atu Halo Refleksaun Ba Servisu sira Hala’o ona, no Hadiak Diak liu tan iha Tinan 2026.

Díli, 05 Janeiru 2026 – Sekretaria Estadu Kooperativas (SEKoop) realiza seremónia hasa’e Bandeira Nasionál iha semana dahuluk fulan Janeiru 2026, ne’ebé hala’o iha edifísiu SEKoop ACAIT, Díli.

Seremónia ne’e diriji husi Diretór-Jerál Interinu SEKoop, Eng. Olderico Lopes, hanesan Inspektór Seremónia, hodi reprezenta Eselénsia Sekretáriu Estadu Kooperativas, Eng. Arsénio Pereira da Silva, M.Agr., no mos lê diskursu ofisiál Sekretáriu Estadu nian.

Iha diskursu ne’e, Sekretáriu Estadu Kooperativas hato’o saudações Boas Festa Santo Natal 2025 no Boas Entradas Tinan Foun 2026 ba funsionáriu permanente, ajente administrativu, funsionáriu kazuais, asesor, apóiu polítiku no tékniku profisionál sira hotu iha ámbitu SEKoop.

Sekretáriu Estadu husu ba hotu-hotu atu halo refleksaun ba servisu sira ne’ebé hala’o ona, no identifika buat sira ne’ebé seidauk diak, atu bele hadia diak liu tan iha tinan 2026, hodi fó servisu ne’ebé diak liu ba povu no kontribui ba dezenvolvimentu rai doben Timor-Leste.

Nia mos husu ba kargu diresaun no xefia sira atu kontinua halo servisu iha administrasaun públika tuir lei no regulamentu, no hatete katak iha planu mudansa estrutura organizasionál iha SEKoop. Mudansa ne’e sei hala’o tuir prosesu Komisaun Funsaun Públiku nian.

Sekretáriu Estadu husu mos ba funsionáriu kazuais sira katak kontratu servisu sei tuir nesesidade instituisaun nian no planu asaun anuál tinan 2026. Karik balun la kontinua servisu iha SEKoop, nia subliña katak hanesan Timor oan, servisu iha fatin ne’ebé deit, objetivu mak servisu ba nasaun no dezenvolvimentu rai doben Timor-Leste.

Seremónia hasa’e Bandeira Nasionál ne’e hala’o ho responsabilidade husi funsionáriu permanente no ajente administrativu sira.

#Média SEKoop#