SEKoop Loke Semináriu Nasionál Kona-ba Jestaun Kooperativas iha Maliana.

Maliana, 21 Novembru 2025.

Sekretáriu Estadu Kooperativas (SEKoop), Eng. Arsénio Pereira da Silva, M.Agr., loke ofisiálmente Semináriu Nasionál kona-ba jestaun kooperativa no sustentabilidade bem-estar membru sira, ne’ebé hala’o iha salaun Câmara Maliana, loron 21 Novembru 2025.

Semináriu ida ne’e nia objetivu mak, troka esperiénsia, fó koñesimentu foun kona-ba prinsípiu kooperativizmu, no motiva partisipante sira atu kontinua dezenvolve kooperativa sira iha Timor-Leste.

Iha diskursu abertura, Eng. Arsénio subliña importánsia semináriu ne’e hanesan plataforma ida atu hasa’e kapasidade líder kooperativa no membru sira.

“Hau husu ita boot sira atu aproveita oportunidade ida ne’e ho di’ak, tanba kooperativa bele sai mekanismu atu hasa’e ekonomia familiár. Jestaun di’ak sei garante sustentabilidade no rezulta diretu ba komunidade,” — hateten SEKoop.

Nia mos enkoraja líder komunidade no membru kooperativa sira atu hare kooperativa hanesan fonte rendimentu primeiru ba familia iha área rurál no remota, liuhosi inisiativa ekonómiku ne’ebé bele kontribui ba krésimentu ekonomia lokál.

Prezidenti Federasaun Kooperativa Créditu Leno Dalan (FENACU LENDA), João Belo, hateten katak semináriu ne’e importante tebes atu kolekta ideia, reforça direksaun, no hamosu vizãun foun kona-ba dezenvolvimentu kooperativa.

Semináriu ida ne’e organiza hamutuk husi FENACU LENDA, Kooperativa LANAMONA, no iha koordinasaun direta husi SEKoop. Oradór prinsipal sira mak mai husi Kooperativa Kréditu Pintu Air husi Maumere (NTT), SEKoop rasik, Bispu Maliana Dom Norberto do Amaral, no oradór sira seluk tan.

Atividade ne’e sei dura loron rua, husi 21 to’o 22 Novembru, ho partisipante mak reprezenta prezidente federasaun multi-kooperativa sira husi munisípiu sanulu resin rua no líder komunidade sira husi Munisípiu Bobonaro.

#Média SEKoop