SEKoop Fasilita Formasaun Prosesamentu Bafo Kayrala Ba Movimentu Kooperativa Sira Iha Munisípiu Díli

Díli, 12 Juñu 2025

Sekretaria Estadu Kooperativa (SEKoop) liu husi Diresaun Nasionál Promosaun Produtu Kooperativa fasilita formasaun kona-ba prosesamentu produtu Bafo Kayrala sai produtu finál ba membru Kooperativa sira, cafetaria no catering husi Munisípiu Díli, iha Salaun Esperansa, Delta.

Objetivu husi formasaun ne’e, atu partilla kuñesimentu ba membru Kooperativa no grupu sira, oinsa maka sira bele halo prosesamentu ba produtu Bafo Kayrala sai produtu finál ho variedade oioin, hodi nune’e bainhira oferese snack ka hahán ba atividade ruma, liu-liu ba instituisaun estadu sira tenki inklui mos produtu sira iha rai laran.

Programa ida ne’e mós hola parte iha prioridade IX Governu Konstitusionál nian ne’ebé responsabiliza husi SEKoop, liu-liu Kooperativa agrikola kona-bá Produsaun Panífikasaun (produz paun) ne’ebé nu’udar produtu ida derivadu husi materia prima hanesan Bafo Kayrala, aifarina no seluk-seluk tan ne’ebé agrikultura Timoroan mak prodúz.

“Ha’u hanoin formasaun ida ne’e, ita tau iha Planu Asaun Anuál tinan 2025 nian. Bainhira kamponeze sira prodúz produtu barak ona, tenki prosesa sai produtu finál, hodi fornese ba merkadu lokál sira ne’ebé maka iha,” afirma SEKoop.

Iha polítika IX Governu Konstitusionál nian, liu-liu polítika Sekretaria Estadu Kooperativa, produtu Bafo Kayrala inklui iha menu merenda eskolár nian hamutuk ho produtu sira seluk ne’ebé riku ho proteina no nutrisaun barak.

“Bafo Kayrala ninia merkadu ida maka merenda eskolár, tanba ita presiza hahán nutritivu ba labarik sira hodi konsumu. Hahán sira ne’ebé bele iha benefísiu bo’ot ba sira nia kresimentu,” hatutan SEKoop.

Agora dadaun, ema barak mos seidauk iha kuñesimentu kle’an kona-ba produtu Bafo Kayrala rasik. SEKoop sei kontinua atu promove ho eskala bo’ot atu ema barak bele iha kuñesimentu hodi konsumu.

“Ema barak mos seidauk toman hodi konsumu produtu refere, entaun ba oin Diresaun Nasionál Promosaun Produtu Kooperativa sira maka tenki servisu maka’as hodi promove nafatin Bafo Kayrala iha eventu feira, eskola no fatin sira seluk tan. Bafo Kayrala rasik iha ninia nutrisaun di’ak ba ema nia saúde no animal nia kresimentu,” subliña SEKoop.

Entretantu atividade formasaun ida ne’e sei hala’o durante loron tolu nia laran, hahú husi loron 12 to’o 14 Juñu 2025, no partisipa husi Movimentu Kooperativa no Grupu sira hanesan: Kooperativa Feto Timor-Leste (KOFETIL), Kooperativa Feto Potensiál, MBX, CU PAUN MORIS, CU DADIRAH, Dino Catering, no CU Emprendedorizmu.

Formasaun ho tipu hanesan ne’e, molok ne’e DNPPC-SEKoop oferese ona ba Movimentu Kooperativa no Grupu sira iha Munisípiu Baucau, RAOEA, Covalima, Viqueque, Ainaro, Aileu, no sei kontinua nafatin expande ba munisípiu seluk.

Média SECoop