SEKoop Halo Abertura Ba Formasaun Jestaun Patrimóniu Estadu Nian Iha Railaku

Díli, 30 Juñu 2025

Sua Eselénsia Sekretáriu Estadu Kooperativa (SEKoop), Eng. Arsénio Pereira da Silva, M.Agr., halo abertura ba formasaun kona-bá Jestaun Patrimóniu Estadu nian ba funsionáriu SEKoop sira iha Salaun CCT Railaku.

Objetivu hosi formasaun ne’e maka atu eleva kuñesimentu funsionáriu sira nian, liu-liu kona-ba utilizasaun Patrimóniu Estadu nian ne’ebé maka agora dadaun Sekretaria Estadu Kooperativa iha, hanesan, kareta, motor, Edifísiu no selu-seluk tan.

Iha Sua Eselénsia SEKoop ninia intervensaun husu partisipante sira ba formasaun ne’e atu partisipa ho didi’ak no akompaña didi’ak kuñesimentu sira ne’ebé formadór sira partilla atu bele hatene no kontribui ba servisu ho efetiva iha knaar hirak ne’ebé atribui ona ba funsionáriu idak-idak.

Sua Eselénsia SEKoop mos rekomenda ba parte Diresaun Patrimóniu Estadu nian, atu haree didi’ak fali regulamentu sira ne’ebé maka agora dadaun implementa hela ne’e, bainhira buat hotu-hotu sentraliza iha patrimóniu estadu sei difikulta atividade sira iha baze, tanba Sekretaria Estadu Kooperativa ne’e servisu barak liu iha baze.

Entretantu formasaun ne’e sei hala’o durante semana ida nia laran, hahú husi Segunda-Feira too Sesta-Feira iha Salaun CCT Railako. Formandu sira mai husi funsionáriu SEKoop Munisípiu Aileu, Ainaro, Bobonaro, Covalima, Manufahi, Díli no RAOEA no formadór sira mai Ministériu Finansas.

Prezensa iha serimónia abertura ne’e maka hanesan, Diretór-!Geral SECoop, Eng Olderico Lopes, Xefe Gabinete, Eng. Leovogildo Belarmino M.Sc., Reprezentante Komandante PNTL Eskuadra Railaku, Reprezentante Administradór Postu Administrativu Railako, Diretora Patrimóniu Estadu no asesor sira.

#Média SEKoop#