SEKoop Ofisiálmente Lansa Kafé LEOBALI Iha Leorema.

Leorema, 20 Juñu 2205

Sua Eselénsia Sekretáriu Estadu Kooperativa (SEKoop), Eng. Arsénio Pereira da Silva, M.Agr., hamutuk ho Sekretáriu Estadu Veteranu, Cesar dos Santos da Silva “Merak” no Prezidente Autoridade Munisípiu Likisá, Paulino Ribeiro ofisialmente lansa Kafé marka Leorema Bazartete Likisá (LEOBALI) iha Sentru Turizmu Komunitaria Suku Leorema, Postu Administrativu Bazartete, Munisípiu Likisá, iha Sexta-Feira lokraik.

Hafoin lansamentu, Sua Eselénsia Sekretáriu Estadu Kooperativa iha ninia intervensaun hato’o katak SEKoop komprometidu sei kontinua fó apóiu no fasilita formasaun ba jestór sira, hodi

aumenta liu-tán sira nia kapasidade no abilidade, liu-liu iha área ospitalidade nian.

“Hau fó parabéns ba jestór sira ne’ebé maka iha ona inisitiva rasik hodi promove fatin turizmu komunitáriu ida ne’e, ba oin Sekretaria Estadu Kooperativa sei kontinua fó apoiu no fasilita formasaun sira, hodi nune’e bele iha ninia sustentabilidade ba futuru. Grupu ka Movimentu Kooperativa sira ne’ebé antes ne’e hetan on apóiu husi orsamentu liu husi kapitál transferénsia públika, durante ha’u nia mandatu sei sai parseiru permanente,” hateten SEKoop.

Sekretáriu Estadu Kooperativa husu jestór kafetaria LEOBALI nian atu dezenvolve didiak fatin refere, hodi nune’e bele dada vizitante sira husi rai laran no rai liur.

Nune’e mos jestór kafetaria LEOBALI, Imanuel Lobato relata katak, atividade ne’ebé maka sei dezenvolve hamutuk iha fatin refere mak hanesan turizmu komunitáriu hodi fó espasu ba atividade agríkola, ortikultura, pekuária no produsaun sira seluk. Agora dadaun hahú uluk fatin prosesamentu kafé, loja ba kafé no kafetaria ida.

“Ami agradese ba Sekretaria Estadu Kooperativa liu husi Sua Eselénsia ninia lideransa ne’ebé maka fó apóiu orsamentu hamutuk US$9.000, hodi ami harii fatin prosesamentu kafé, loja no kafetaria ida, husu atu ba oin kontinua fasilita hodi nune’e ami nia atividade bele iha ninia sustentabilidade ba futuru” afirma jestór kafetaria LEOBALI.

Marka prezensa iha serimónia ne’e maka hanesan, Reprezentante Komandante PNTL Munisípiu Likisá no Ermera, Guarda Prizaun Gleno no funsionáriu SEKoop sira destaka iha Munisípiu Likisá.

#Média SECoop#