“Nu’udar Timoroan, Mai Ita Servisu Hamutuk Hodi Serví Povu No Rai Ida Ne’e, Hodi Hasai Povu Husi Ki’ak No Mukit“

Díli, 02 Jullu 2025

Liu husi Gabinete Sekretáriu Estadu Kooperativa servisu hamutuk ho ajénsia Blue Venture hodi organiza reuniaun Koordenasaun ba dala tolu hamutuk ho parseiru dezenvolvimentu sira durante loron ida iha Salaun Beach Garden Hotel, Pantai Kelapa, Díli.

Reuniaun ne’e ho objetivu atu tau hanoin hamutuk oinsa maka bele dezenvolve di’ak liu tán setór kooperativa, hodi bele serví povu no rai ida ne’e di’ak liu tan. Nomos bele hamosu plataforma forte ida hodi troka esperiénsia sira, partilla ideia inovadora sira no solusaun prátiku ba dezenvolvimentu no fortalesimentu Kooperativa sira iha nivél baze no empodera komunidade no família sira iha zona rural sira.

Iha Sua Eselénsia Sekretáriu Estadu Kooperativa (SEKoop), Eng. Arsénio Pereira da Silva, M.Agr., nia intervensaun, husu parseiru dezenvolvimentu sira atu servisu hamutuk hodi hasa’e kreximentu ekonomia komunidade sira nian.

“Tuir prinsípiu kooperativa nian katak, labele halo mesak no labele la’o mesak, maibé nu’udar Timoroan mai ita la’o hamutuk hodi atinji mehi no metas hirak ne’ebé ita hotu hakarak hodi dezenvolve povu no rai ida ne’e. Liu husi reuniaun ida ne’e bele hametin liu tan servisu hamutuk hodi serví populasaun iha área rurál no remota sira,” Subliña SEKoop

Sekretáriu Estadu Kooperativa iha oportunidade ida ne’e, husu ba parseiru sira nia kontribuisaun, halo koordenasaun di’ak no fo liman ba malu nafatin, tamba servisu hotu-hotu ninia rezultadu finál mak ba povu no rai ida ne’e, oinsa mak liberta povu husi ki’ak no mukit.

Enkuantu Reuniaun Koordenasaun ba dala tolu ne’e, marka prezensa husi ajénsia sira hanesan, ADRA, World Vizion Timor-Leste (WVTL), WFP, Banku Sentrál Timor-Leste, CRS, UNDP, RAEOA, Plan International, Blue Venture, no parseiru sira seluk tan.

#Média SEKoop#