TL no Indonézia Hametin Kooperasaun iha Setór Kooperativas no Empreza Mediu no Kiik iha Área Fronteira.

Atambua, Sekretáriu Estadu Kooperativas Timor-Leste (SEKoop), Eng. Arsénio Pereira da Silva, M.Agr., hala’o vizita ofisiál ba Munisípiu Belu, Atambua, Indonézia, hodi hametin kooperasaun iha área kooperativa no empreza mediu no kiik (MSME) iha área fronteira Timor-Leste–Indonézia.

Enkontru ofisiál ne’e hala’o iha Rezidénsia Ofisiál Bupati Belu, Willybrodus Lay, iha Sesta (7/11), hanesan parte husi akompañamentu ba memorandu entendimentu (MoU) ne’ebé asina iha Jakarta tinan kotuk entre Governu Timor-Leste, liuhusi Sekretaria Estadu Kooperativas, no Governu Indonézia, liuhusi Ministériu Kooperativa no Empreza Mediu no Kiik (Kemenkop UKM).

Iha enkontru ne’e, parte rua diskute oportunidade no inisiativa konjunta hodi fó impulsu ba dezenvolvimentu ekonomia komunidade iha rejiaun fronteira.

Sekretáriu Estadu Kooperativas, Eng. Arsénio Pereira da Silva, deklara katak vizita ne’e hanesan pasu konkretu ba implementasaun akordu sira ne’ebé asina iha Jakarta.

“Liuhusi kolaborasaun ida ne’e, ita hein atu mutuamente fasilita kreximentu ekonómiku iha rejiaun fronteira RI-RDTL, atu ita bele dezenvolve hamutuk. Vizita ida ne’e hanesan pasu dahuluk atu realiza atividade konjunta konkréta sira,” nia hatete

Bupati Belu, Willybrodus Lay, mos fó apresiasuan ba vizita delegasaun Timor-Leste nian, no konsidera ne’e hanesan oportunidade importante atu reforsa relasaun iha fronteira.

“Ha’u kontente tebes tanba ita bele hasoru malu hodi kontinua implementa akordu sira ne’ebé ita halo tiha ona. Ha’u hein katak kooperasaun ida ne’e sei fó benefísiu boot ba komunidade iha fronteira Belu,” hatete Bupati Willy.

Bupati mos dezklara katak iha futuru, administrasaun Belu sei prepara expo konjunta ba Empreza Mediu no Kiik iha área fronteira, hanesan plataforma atu promové produtu lokál, fó espasu ba kooperasaun setór emprezarial sira, inklui kooperativa Merah Putih.

Durante vizita, delegasaun Timor-Leste mos aproveita oportunidade atu vizita instituisaun kooperativa susesu iha Belu, hanesan Kooperativa Pintu Air, Credit Union (CU), no uniaun kréditu seluk, hodi aprende modelu dezenvolvimentu negósiu komunidade lokál Indonézia nian.

Delegasaun Timor-Leste ne’e konpostu husi Eng. Arsénio Pereira da Silva (Sekretáriu Estadu Kooperativas), Eng. Olderico Lopes (Diretór Jerál SEKoop), Eng. Leovogildo Belarmino, M.Sc (Xefe Gabinete), Aderito Gonsaga (Diretór Nasionál Gestaun Rekursus Humanus), no representante Konsuladu Timor-Leste iha Atambua.

Bupati Willy Lay mos akompaña husi Prezidente Ekipa PKK Belu, Adjuntu Asistente ba Dezenvolvimentu Amenidade no Asesibilidade Turizmu, Funsionáriu DPM Belu (PPM), no Sekretáriu Interinu Konsellu Reprezentante Povu Rejionál Belu (DPRD).

Vizita ofisiál ne’e reforsa kompromisu Governu rua atu kontinua promove dezenvolvimentu ekonomia lokál, no hametin kooperasaun harmónia iha área fronteira.

#Média SEKoop#