SEKoop Konsidera Graduadu IEFS Importante Ba Dezenvolvimentu Mudansa Ekonomia Iha Baze.

Gleno, Sábadu 14 Juñu 2025

Sua Eselénsia Sekretáriu Estadu Kooperativa (SEKoop), Eng., Arsénio Pereira da Silva, M. Agr., partisipa iha serimónia Graduasaun Populár Datolu husi Institutu Ekonomia Fulidaidai Slulu- (IEFS) iha loron sábadu, 14 Juñu 2025, iha Madium, Suku Fatuqueru, Postu Administrativu Ermera, Munisípiu Ermera.

Tema graduasaun ba tinan ida ne’e maka “Haburas Kuñesimentu no Kuda Esperansa.” Graduadu hamutuk ema na’in 21 ne’e, durante fulan neen tuir ona teoria iha aula nomos hala’o pratika iha terenu.

Sua Eselénsia SEKoop iha ninia intervensaun ko’alia liu kona-ba polítika IX Governu Konstitusionál nian iha esforsu ba reforsa kooperativa iha baze no partisipasaun juventude sira nian iha dezenvolvimentu Kooperativa Produsaun.

SEKoop konsidera edukasaun pupulár importante tebes iha reforsa movimentu kooperativizmu sira iha baze, liu husi juventude sira ne’ebé gradua ona, ho sira nia nia abilidade ne’ebé sira adkiri, prontu lidera aspetu no área oi-oin iha komunidade nia le’et hodi motiva sira no kontinua ho espiritu lideransa, konsiénsia sosiál no voluntarizmu ne’ebé sira iha, bele halo mudansa ba Timor-Leste husi baze.

“Hau fó parabéns ba graduadu sira no espera katak fila ba idak-idak nia fatin, implementa metenek sira ne’ebé maka hetan ona iha IEFS, hodi halo mudansa ba dezenvolvimentu ekonomia baze hodi kontribui hasa’e krésimentu ekonomia famíliar nian,” hateten SEKoop.

Sekretáriu Estadu Kooperativa mos hatutan tan katak, iha polítika IX Governu Konstitusionál nian, kontinua suporta ba grupu hirak ne’ebé iha vontade atu hamriik rasik, liu husi fundu natoon ne’ebé mak SEKoop iha, ba ema hotu ne’ebé organiza-an atu sai transformadór hodi lori prosperidade besik liu-tán ba povu. Odamatan SEKoop nian kontinua nakloke, bele hakaat ba hodi haree posibilidade servisu hamutuk sira.

Entretantu, prezensa iha serimónia graduasaun ne’e maka hanesan, Reprezentante Prezidente Autoridade Munisípiu Ermera, Co-Diretor KSI, Jenito Santana, Koordenadora Regional APHEDA, Holly Fingland, Sekretáriu Jeral Uniaun Traballador Autralia do Sul, Koordenadór Uniaun Agrikula Ermera (UNAER), Bobonaro, Covalima, Manufahi no Ainaro, lideransa komunitária no família hosi graduadu sira.

Média SECoop