SEKoop Halo Abertura Expozisaun Promove Foinsa’e Iha Setór Produtivu

Maubisse, 12 Agostu 2025

Tersa-Feira dadeer, Sekretáriu Estadu Kooperativa (SEKoop), Eng. Arsénio Pereira da Silva, M.Agr, dezloka ba Munisípiu Ainaro hodi halo abertura ba expozisaun ho Tema”Promove Juventude Foinsae Iha Seitor Produtivu, Investe Agora”, iha Rabilau, Postu Administrativu Maubisse, Munisípiu Ainaro.

Iha nia intervensaun hato’o katak, bainhira simu konvite ne’e, nia sente laran kontente tebes tamba atu mai partisipa hodi partilla mós informasaun balun kona-bá papél Sekretaria Estadu Kooperativa nian ba grupu foinsa’e sira no hanesan parte husi governasaun ida ne’e iha planu, saída mak bele fahe, saida mak bele kontribui hamutuk hodi dezenvolve rai ida ne’e.

Nia hatutan, foinsa’e mak sei sai hanesan ai-rin ba rai ida ne’e iha área hotu- hotu, hanesan Ekonomia, Sosiál, Kultura no seluk-seluk tan.

“Nebé ha’u simu ita-bo’ot sira nia konvite, ha’u kontente hodi tau iha ajenda para hodi mai partisipa no mai partilla hanesan governu atu saída ita bele halo hamutuk iha futuru.”

Aleinde loke abertura ba expozisaun ne’e, iha mós diálogu entre Governu ho Grupu hirak ne’ebé partisipa iha eventu ne’e, hodi hato’o sira nia preokupasaun no sujestaun balun ne’ebé sira iha kona-bá lala’ok servisu Governu nian iha durante ne’e.

Iha serimónia abertura ne’e hetan partisipasaun husi reprezentante husi SEFOPE, Ministériu Agrikultura, Ministériu Komérsiu no Indústria, OXFAM, reprezentante husi BNCTL, reprezentante PAM Aileu, reprezentante komandante PNTL Munisípiu Ainaro, Asosiasaun Jornalista Timor-Leste (AJTL) no mos ho Grupu hirak ne’ebé halo atividade negósiu iha Munisípiu Ainaro no Munisípiu sira seluk.

#MédiaSEKoop2025