Likisa 22 Maiu 2024, Secretaria de Estado de Cooperativas (SECoop) liu hosi Diresaun Nasionál Promosaun Produtus Kooperativas (DNPPC, Sigla Portugues) kontinua halo promosaun ba produtu final Batar no Fos (Bafo) Kayrala nivél Munisípiu iha Munisípiu Likisa, iha Salaun Tokodede.

Iha promosaun ne’e prezensa hosi estudante sira hahú nível ensino pre-eskolar to’o ensinu sekundaria sira hodi koko sabor produtu final hosi Bafo Kayrala nian hanesan, Sasoro Bafo Kayrala, dose bafo kayrala, etu bafo kayrala, coklate bafo kayrala, bolinus, kukies, kolak, paun, no selu-selu tan.

Hafoin koko sabor Bafo Kayrala nian Estudante ho Naran Nelsia Maria Alves Corea, hosi Eskola Básiku Central Maumeta nian espresa ninia sentimentu katak kontente sabor ho produtu lokal Bafo Kayrala nian espera katak bele implementa lalais iha merenda eskolar iha teritóriu laran tomak.
“Hahan hosi Bafo Kayrala ne’e diak teb-tebes mai ita, no kapas los, bainhira tama iha menu meranda ekolar senti kontenti” subliña Nelsia.

Iha tempu hanesan hanesan Sua Eselénsia Secretário de Estado de Cooperativas (SECoop), Eng. Arsénio Pereira da Silva, M.Agr., agradese ba Kamponezes tanba bele kultiva ona Bafo Kayrala, agradese mos ba feto kreativu no inan feto sira hosi Guisu tanba bele prosesa ona Bafo Kayarala produtu final nomos agradese ba DNPPC tanba bele realiza atividade promosaun ba produtu final Bafo Kayrala.
“Hau hakarak fó agradese ba DNPPC SECoop nian ne’ebé maka toma konta ba halo promosaun iha teritóriu laran tomak, agradese mos ba hau inan sira ne’ebé maka mai hosi Guisu no feto kreativu halo prosesamentu, inklui Kamponezes sira ne’ebé maka halo produsaun ba Bafo kayrala rasik. Espera katak DNPPC bele habelar tan atividade promosaun ba Munisípiu sira hotu iha teritóriu laran, atu komunidade sira bele hatoman aan konsumu produtu lokal sira ne’ebé maka ita rasik produz riku ho nutrisaun hodi nune’e bele subtitui hahan sira ne’ebé maka importa hosi rai liur” afirma SECoop.

Secretario de Estado de Cooperativas haktuir tan, parte hosi Governu, iha komitmentu boot atu fasilita produtor sira, sira ne’ebé maka iha kreativu no inisiativu atu kria servisu ba aan rasik no ba ema seluk hanesan kria idústria uma kain, ida ne’e bele fó apoiu atu bele sai industria bo’ot no ninia sustentabilidade ba futuru.
“Polítika IX Governu Konstitusionál nian, liu-liu SECoop nian, programa maka foka liu bq Kooperativa produsaun agrikula ho ninia produtu prima maka Bafo kayrala ne’e rasik, tanba produtu ne’e, ida deit maibe ita bele multifika ninia funsaun ne’e barak, liu hosi ninia “kadeia de valor” sira ne’e maka ita bele hasa’e krésimentu ekonomia uma kain nian. Agora dadaun produtór sira Produz ona Bafo Kayrala hamutuk tonelada 74 resin iha teritóriu laran tomak, no husu nafatin ba funsionáriu sira destaka iha Munisípiu atu hala’o akompañamentu ba Kamponezes hodi kontinua produz nune’e bele fornese ba merenda eskolar, merkadu lokal no nasionál sira” hatutan SECoop.

Nune’e mos Secretário Asuntu Sosias Munisípiu Likisa, ne’ebé maka Reprezentante Prezidente Autoridade Munisípiu Likisa nian, husu ba produtór sira atu kontinua produz, tanba ba merenda eskolar nian ne’ebé aloka mai Munisipal ne’e boot tebes, maibe osan sira ne’e semo hotu ba liur, tanba produtu lokal menus, ho ida ne’e rai produtivu ne’ebé maka abandona hela husu atu halo podusaun.

Entretantu Promosaun Pordutu Kooperativa Produsaun nian ho Tema “Kuda Saida Maka ita no han saida mk ita kuda” ne’e, kontinuasaun hosi lansamentu Promosaun produtus kooperativas nian nível nasionál tinan kotuk iha portu Díli. Tanba iha Momentu ne’eba Sua Eselénsia Primeiru Ministru, Maun Boot Kayrala Xanana Gusmão orienta kedan atu halo promosaun iha kada munisípiu to’o suku no aldeia sira. Tuir planu DNPPC nian katak iha seman oin atividade hanesan mos sei hala’o iha Munisípiu Covalima hafoin remata sei kontinua ba Munisípiu sira seluk.

Prezensa iha seremónia ne’e maka hanesan, Administrador Postu Administrativu Loes, Diretor Geral SECoop, Eng. Olderico Lopes, Xefe Gabinete SECoop, Eng. leovogildo Belarmino M.Sc., Prezidente Cooperativa CCLN, Vicente Conceição “Railos”, Reprezentante Ministeriu Edukasaun, Reprezentante Ministeriu Agrikultura, xefe suku no aldeia sira, Movimentu Kooperativa sira, inklui estudante sira.

#Mídia SECoop#.