SECoop Kontinua Hala’o Lansamentu Kuileta no kuda Bafo Kayrala iha Beiseuk-Tilomar.
Covalima, 16 Abril 2024, Sua Eselénsia Secretário de Estado de Cooperativas (SECoop), Eng. Arsénio Pereira da Silva, M.Agr., hamutuk Administrador Postu Administrativu Fohorem, Reprezenta Komandante PNTL Munisípiu Covalima, Movimentu Kamponezes Timor-Leste (MOKATIL) nomos produtór sira kontinua hala’o lansamentu kuda Kuilleta Bafo Kayrala hamutuk hektares 8 maibe iha fatin difirenti no Kuda Bafo Kayrala hektare ida iha Aldeia Baer, Suku Beiseuk, Postu Administrativu Tilomar, Munisípiu Covalima.
“Ohin Mai hala’o lansamentu kuda Bafo Kayrala hektar ida no Kuilleta hektares rua ho balun iha fatin ida ne’e, no hektares lima ho balun iha area difirenti. Produtu Bafo Kayrala ne’e rasik bainhira ita kuda lahare ba tempu bailoron ka udan, maibe kuda iha tinan tomak, produtu ne’e rasik ninia nutrisaun diak ba saúda ema no animal nian, inklui produtu final hosi Bafo Kayrala hamutuk 30 resin” afirma SECoop.
SECoop mos aprésia ho produtór sira tanba iha inisiativa rasik hahú prepara rai, kuda to’o kuilleta hatudu rejultadu diak, maske rai uituan maibe Kamponeze sira utiliza ho diak hodi halo produsaun integradu hamutuk ho produtu sira seluk nune’e bele hasa’e produsaun no ekonomia familiar nian.
Kona-ba preokupasaun no rekomendasaun produtór sira nian Governante ne’e relata katak sei responde ho asaun iha tempu badak, tuir kbiit finanseiru SECoop nian inklui ninia prioridade sira.
Iha tempu hanesan Xefe Suku Beiseuk aprésia ho programa SECoop nian ne’ebé implementa hosi MOKATIL, kuda Bafo Kayrala ida ne’e kapas tebes.
“Hau husu Komunidade sira iha Aldeia Baer hamutuk uma kain 61, ba futuru hotu-hotu tenki involve-aan iha vida Kooperativizmu tanba seitor ida ne’e maka bele hasa’e krésimentu ekonomia familiar nian iha área rural sira” subliña Xefe Suku.
Nune’e mos Xefe Grupu, Julio de Araújo fó agradese ba Sua Eselénsia SECoop ho ninia Ekipa bele to’o iha sira nia fatin, liu hosi prezensa ne’e bele motiva diak liu tan komunidade sira hodi Partisipa programa Governu nian, liu-liu involvimentu iha movimentu Kooperativa sira.
Entretantu rai ne’ebé maka produtor sira prepara iha Munisípiu Covalima hamutuk hektares 160, balun kuda ona, balun funan ona, balun foin maka atu kuda no ida tasak ona atu kuilleta maka hamutuk hektares 28 iha fulan ida ne’e.
