SEKoop Fó Pose Ba Konsellu Diretiva no Konsellu Fiskal C-MSKK nian
Gabinete SECOOP
Díli: 09 Agostu 2025.
Sua Eselénsia Sekretáriu Estadu Kooperativa (SEKoop), Eng. Arsénio Pereira da Silva, M.Agr.fó pose ba Konsellu Diretiva no Konsellu Fiskal Cooperativa Multi-Sektoriál Kadunan Kay Rala (CMSKK) ba periodu tinan haat (2025-2029) iha Salaun Paróquia Sagrado Coração de Jesus Bekora.
Tuir artigo 138 Konstituisuan Repúblika Democrática Timor Leste, konsidera artigo 50, artigu 59, artigu 115 no dekretu lei No. 16/2004, alterada ho dekretu lei No. 76/2022, hodi hari’i Cooperativa nu’udar resposta no kontribuisaun ba programa Sekretária de Estadu Kooperativas (SEKoop) ne’ebé tuir planu fasilita hari’i cooperativa iha Municipiu hotu-hotu iha Timor laran tomak.
Antes atu hari’i Cooperativa Multi Sektorial Kadunan Kay Rala (CMSKK), hahú husi sensiblizasaun, formasaun bazika no diskusaun estatutu cooperativa neʼebé realiza iha Dia 10-14, Fulan Marsu Tinan 2025, kontinua ho sorumutu koordenasaun iha dia 1-4 Fulan agusto Tinan 2025 no deside atu hala’o asembleia konstituitiva ne’ebé maka fasilita hosi formadór sira Sekretaria Estadu Kooperativas nian.
Vise Primeiru Ministru, Ministru Koordenador Asuntus Ekonómikus, Ministru Turizmu no Ambiente, Dato Sri Francisco Kalbuady Lay iha ninia intervensaun hateten katak, IX Governu Konstitusionál iha komitmentu bo’ot hodi fó apoiu ba Movimentu Kooperativa sira iha teritóriu laran tomak.
“Hau fó parabéns ba dirijenti Kooperativa nian ne’ebé maka foin simu pose, Kooperativa importante tebe-tebes ba dezenvolvimentu ekonomia iha baze, hanesan Ministru Koordenador Asuntus Ekonómikus iha komitmentu bo’ot atu apóiu movimentu kooperativa sira, liu hosi Sekretaria Estadu Kooperativa” Subliña VPM.
Nune’e mos Sekretáriu Estadu Kooperativa, Eng. Arsénio Pereira da Silva, M.Agr. iha ninia intervista relata katak SEKoop rejistu ona Kapitál movimentu kooperativa sira 148 ho ninia kapitál hamutuk 20 miloens resin nomos sei fasilita nafatin movimentu kooperativa sira iha baze liu formasaun no Sensibilizasaun.
“Ohin hau fó pose ba Kooperativa Multi-Sektoriál Kadunan Kay Rala ne’e, hanesan lejitímu ona hodi rejistu iha SEKoop, ba oin sei fasilita hodi rejistu iha notariadu, ninia membru sira hala’o atividade Multi-Sektoriál hodi kontribui ekonomia membru sira nian.Tuir dadus Sekretaria Estadu Kooperativa nian, movimentu kooperativa primaria sira ne’ebé maka agora dadaun rejistu iha s hamutuk 148, federasaun hamutuk 12 ho ninia membru hamutuk ema nain rihun tolu nulu resin sia ho ninia kapitál hamutuk osan miloens 20 resin” afirma SEKoop.
Prezidente Cooperativa Multi Sektoriál Kadunan Kay Rala (CMSKK), Antonio Salvador de Carvalho Rangel agradese ba ekipa Sekretaria Estadu Kooperativas nian ne’ebé durante ne’e fasilita ona formasaun bázika sira, CMSKK nakloke ba ema hotu atu involve.
Marka Prezensa iha seremónia ne’e maka hanesan, Prezidenti Komisaun C Parlamentu Nasionál, Sidaliza Faria dos Santos, Ministru Agrikultura Pekuáriu Peskas no Floresta, Marcos da Cruz.
#Média SEKoop#