SECoop Aprésia ho Dezenvolvimentu CU Enclave no husu investe iha área Produtivu sira.
RAEOA, 24 Maiu 2024.
Sua Eselénsia Secretário de Estado de Cooperativas (SECoop), Eng. Arsénio Pereira da Silva, M.Agr hala’o abertura ba Asemblia Jeral Membru (AJM) Kooperativa Créditu Union Enclave (CU Enclave) ba dala XIII iha Hotel Oebau, Pante Makasar, Região Administrativo Especial Oecuse Ambeno (RAEOA).
Tema Sentral ba AJM ne’e maka ” Promove Transparansia ho Dijitalizasaun liu hosi rai no impresta osan ho Displiña”
Iha sesaun abertura ne’e Sua Eselénsia SECoop ninia intervensaun fó parabens ba dirijenti no membru sira tanba bele haboot ona sira nia Kooperativa to’o ohin, no husu atu membru sira investe mos iha área Produtivu sira.
“Ohin iha relatóriu ne’e hatudu katak CU Enclave maka ninia kapitál no membru sira maka boot liu Kooperativa sira hotu iha teritóriu laran tomak, hau fó parabens ba Prezidente CU ho ninia membru sira, tanba servisu maka’as hosi dírijenti no estrutura tomak maka Cooperativa hetan susesu refere. Hau enkoraja ba membru Kooperativa Enclave nian atu investe mos iha área produtivu sira” afirma SECoop.
Secretário de Estado de Cooperativas komprometidu katak hanesan Governu atu hala’o dezenvolvimentu liu hosi seitor Kooperativa nian, maka oinsa atu fó apóiu no fasilita movimentu kooperativa sira ne’ebé maka ejisti hodi kontribui dudu krésimentu ekonomia familiar nian.
Iha tempu hanesan Prezidenti CU Enclave, Martino Abani agradese ba prezensa Sua Eselénsia SECoop, liu hosi prezensa ne’e bele motiva diak liu tan sira atu hakat ba óin, iha sesaun abertura ne’e mos bele partilla politíka IX Governu nian ligadu ho dezenvolvimentu seitor kooperativas nian ba membru kooperativa sira.
Entretantu CU Enclave harii iha tinan 22 ba kotuk, no agora dadaun iha membru ativu hamutuk ema nain 1.484, kompostu hosi mane hamutuk ema nain 892 no feto hamutuk ema nain 592, ho kapital Cooperativa nian, hanesan osan, rai, uma kareta, komputer, motor no selu-seluk tan hamutuk $ 2.607.079,00 dollar Amerikanu.
Prezensa iha AJM CU Enclave nian ba dala XIII maka hanesan, Reprezentante Prezidente RAEOA, Reprezentante ZEDOA, Komandante PNTL RAEOA, movimentu Kooperativa primaria sira, no membru sira.
