PM ENSERA SORUMUTU ANUÁL TLDPM
Díli, 17 Maiu 2024, Secretário de Estado de Cooperativas (SECoop), Eng. Arsénio Pereira da Silva, M.Agr., partisipa enseramentu sorumutu “Timor-Leste Development Partnership Meeting (TLDPM) hosi Primeiru Ministru, Maun Bo’ot Kay Rala Xanana Gusmão iha Salaun Auditorium Kayrala Xanana Gusmão Ministériu Finansas Aitarak Laran.
Tema hosi sorumutu TLDPM ne’e maka, “Planu Asaun Tinan Lima IX Governu Konstitusionál” nu’udár plataforma atu diskute vizaun no prioridade estratéjiku Governu nian ba tinan lima.
Perante partisipante sira, Primeiru-Ministru hateten, tinan ida-ne’e Timor-Leste selebra progressu barak ne’ebé alkansa iha demokrasia no pás.
“Iha Prosesu libertasaun no konkista independénsia nasaun ne’e, ami la mesak. Ami nia parseiru dezenvolvimentu sempre akompaña ami no hamutuk ho ami, tuir ami nia ritmu rasik”, Afirma PM.
TLDPM 2024, membru IX Governu hamutuk ho parseiru sira diskute komponente rua mak hanesan, dahuluk kona-bá koordenasaun iha Planu Estratéjiku Dezenvolvimentu Nasionál (PEDN), no daruak diskute kona-bá planu saida mak atu halo iha futuru.
TLDPM nu’udár tradisaun diálogu anuál nível aas ida hodi atualiza progressu importante sira, komunikasaun prioridade sira no promove atividade sira ne’ebé relevante bá dezenvolvimentu Timor-Leste nian.
TLDPM 2024, fó oportunidade bá IX Governu Konstitusionál atu define hodi fó vizaun no orientasaun klara bá mandatu sira seluk Governu nian.
TLPDM organiza hosi Ministériu Finansas (MF) hamutuk ho Ministériu Negósius Estranjeirus no Kooperasaun (MNEK) no iha koordenasaun ho Gabinete Primeiru-Ministru, liuhosi halibur Ofisiál Seniór sira hosi IX Governu Konstitusionál.
Partisipa ativu iha TLPDM ne’e, membru Parlamentu Nasionál (PN), membru Governu sira, reprezentante hosi korpu diplomátiku, parseiru dezenvolvimentu, seitór privadu, sosiedade sivíl, akadémiku no média.
