Dili, 24 Abril 2024
Diretor Geral Eng. Olderico Lopes, reprezenta Secretario de Estado de Cooperativa (SECoop) nebe hanesan Secretario Estado Formasaun Profesionall (SEFOPE) Ein-Ezersisiu hato’o lia hirak nee iha ninia Diskursu iha Ambitu Despedida ba Trabalhador Sazonal sira ba Australia, iha Salaun SEFOPE, Kaikoli, Dili.

Iha despedida nee, Diretor Geral (DG) mos hameno ba Trabalhador Timor oan sira atu halo iha nebe deit no bainhara deit tengki halo ho laran tomak no ho empenhu no responsabilidade, nudar sidadaun Timor oan nebe, Edukadu, Instruidu, Siviku no Sivilizadu, sa tan iha nasaun vizinhu nebe durante nee ajuda ita hodi enfrenta problema oi-oin. vantazen ba servisu iha rai liur nudar oportunidade osan-mean ida, laos deit atu atende deit imi nia nesesidade ekonomia familiar, maibe mos nular fatin formasaun ida ba imi atu haree no aprende saida mak sira halo hodi atende demanda oi-oin merkadu nian iha era global ida nee.

Nia hatutan, nia rasik, familia tomak, povu no nasaun doben ida nee hein hela atu loron ruma saida mak imi sei hetan nudar imi nia esperiensia iha Australia nee bele sai kontributu diak ida ba ita nia dezenvolvimentu ekonomiku iha futuru, atu iha loron ruma, imi sira nee no ita nia jerasaun oin mai sai laos deit EMPREGADU iha rai liur maibe, karik bele, sai mos empregador iha Rai Doben Timor-Leste.
“Hau fiar no tau esperansa nee tomak ba iha alin sira nia liman. Hanesan ita hotu hatene, estadu no governu, iha nebe deit, iha dever atu estimula no apoia tuir ninia kbiit, nia sidadaun sira hodi hetan nia moris diak ho maneira ida nebe positivu. Nee katak ESTADU NO GOVERNU ida nee nia forsa mak fasilita deit imi atu servisu iha rai liur no sei atende imi nia nesesidade ruma, karik iha. Durante imi nia estadia iha ema nia rain, nudar empregadu nebe atu servisu ba empregador ida, keta haluha katak “Kada Jogu iha ninja regras, kada nasaun iha ninja lei no regras rasik”.
Atu remata ninia Diskursu nee, Diretor Geral mos hatoo ninia lia menon ikus katak Timor oan laos hatene servisu deit, maibe tengki hatene mos respeita ema nia lei no regras sira nebe vigora iha ema nia rai, inklui nia kultura no maneira moris nian. Nee duni nia sugere no apela ba alin trabalhador sira atu komporta ho didiak, servisu ho badinas nudar rai doben ida nee ninia reprezentante sira iha liur. Keta haluha katat buat diak mak imi halo, inklui imagen diak nebe imi kuda durante imi hela no servísu iha neba sei halo ema nia odamatan servisu nian nakloke nafatin ba ita. Laos ba imi deit maibe mos ba Timor oan sira seluk,”Tenik Nia.
Tuir informasaun nebe asesu katak Total Trabalhdor Timor Oan nebe mak tau ba servisu nee hamutuk ema nain 74 Pessoas maibe iha Nain mak hakotu i’is iha loron hirak liu ba, tanba nee mak Total Trabalhdor Timor Oan Fiksu mak 73 Pessoas. No iha Total Trabalhdor Timor Oan nee iha ida deit mak fout no restu hou-hou re-entry.
Iha Seremonia Despedida ba Trabalhador Sazonal sira ba Australia, iha partisipasaun husi Kargu Chefia husi SEFOPE no inan aman husi Trabalhador Timor Oan sira.

Media_SECoop