SECoop HALO PROMOSAUN BA PRODUTUS HOSI MOVIMENTU COOPERATIVAS NIAN IHA RAEOA.
RAEOA, 23 Abril 2024.
Secretaria de Estado de Cooperativas (SECoop), liu hosi Diresaun Nasionál Promove Produtu Cooperativas (DNPPC) hala’o promosaun ba produtus hosi Movimentu Cooperativa sira nian, liu-liu produtu Bafo Kayrala, iha Jardim Oebau, Suku Costa, Sub Região Pante Makasar, Região Administrativo Espesial Oecuse Ambeno (RAEOA).
Polítika IX Governu Konstitusionál nian, líu-liu programa Secretaria de Estado de Cooperativas nian maka foka ba Cooperativa Produsaun Agrikula, ho ninia produtu prima maka Batar no Fos (Bafo) Kayrala, maibe integradu ho produtu sira seluk.
Iha Sua Eselénsia Secretário de Estado de Cooperativas (SECoop), Eng. Arsénio Pereira da Silva, M.Agr., iha ninia intervensaun hateten katak, liu hosi promosaun ida ne’e, ema bele kuiñese diak liu tan Bafo kayrala, tanba ba futuru produtu refere sei aihan alternativu, aleinde Batar no fos.
“Hau hanoin liu hosi feira ida ne’e, bele atrai ema seluk atu promove no produz tan, sai hanesan produtus movimentu kooperativa sira nian hodi konsumu iha rai laran, Oinsa maka atu Promosaun ba produtu hodi movimentu kooperativa sira nian, liu-liu produtu Bafo Kayrala, atu nune’e Komunidade no estudante bele kuiñese diak liu tan nomos ba futuru sai aihan alternativu aleinde fos no batar,” afirma SECoop.
Secretário de Estado de Cooperativas mos husu ba Autoridade sira iha RAOEA atu promove nafatin Bafo Kayrala ba komunidade sira, liu-liu iha reuniaun ruma diak liu fornese maka produtu Bafo Kayrala ba bainaka sira hamutuk produtu lokal sira seluk, tanba ninia benefísiu ne’e sei fila fali ba produtór sira, ho asaun sira hanesan ne’e maka bele krése ekonomia familiar nian, duke promove fali produtu sira rai liur.
Ikus SECoop hatutan katak, foin dadauk iha Díli lansa ona Restaurante ba Bafo Kayrala nina lansa ona, iha restaurante ne’e faan produtu final oi-oin hanesan, sasoro, pão, etu fugs hosi Bafo Kayrala, kukies, bolinus no selu-seluk tan.
Iha tempu hanesan Koordenadór Ezekutivu Zona Ekonómika Dezenvolvimentu Espesiál Oe-cusi Ambenu, João Mendes Gonçalves aprésia ho inisitiva hosi Secretaria de Estado Cooperativas promove produtus hosi Movimentu Kooperativa sira nian.
“Hau senti katak inisiativa sira hanesan ne’e diak tebes, atu ita kontinua apóia nafatin ba movimentu kooperativa sira, tanba iha Konstitusaun RDTL hateten katak ekonomia hamrik iha seitor tolu maka hanesan, seitor públiku, privadu no kooperativa rasik, tan ne’e ita ne’e ita tenki dezenvolve seitor Kooperativa ho diak. IX Governu Konstitusionál iha polítika ida ne’ebé maka diak ba dezenvolvimentu seitor kooperativas nian husu parte hotu-hotu nia apóiu hodi dezenvolve seitor Kooperativa iha RAEOA ba oin” hateten João Gonçalves.
Entretantu iha promosaun ne’e mos prezensa hosi profesor no estudante sira hodi koko direita produtu Bafo Kayrala ninia sabor, tanba antes ne’e parte hosi SECoop ho Ministériu Edukasaun iha ona liña koordenasaun atu produtu Bafo Kayrala rasik inklui ona iha menu merenda eskolar nian, liu hosi servisu hamutuk ho parseiru dezenvolvimentu “World Food Program” nian iha Timor-Leste.
Enkuantu produtu final hosi Bafo Kayrala ne’ebé maka halo promosaun iha feira refer maka hanesan, etu hosi Bafo Kayrala, sasor hosi Bafo, dose, pudin hosi Bafo, bolinus, masin midar ben hosi Bafo, no selu-seluk tan.
Prezensa iha seremónia ne’e maka hanesan, Reprezentante Prezidente Autoridade RAEOA, Veteranus, Secretário Regionál sira, Komandante Autoridade RAEOA, profesor no estudante sira, inklui mos reprezentante liña ministeriál sira iha RAEOA.
“Serivu Hamutuk Halo Mudansa”
