RAEOA, 23 Abril 2024, Sua Eselénsia Secretário de Estado de Cooperativas (SECoop), Eng. Arsénio Pereira da Silva, M.Agr., hamutuk ho Reprezentante “World Food Programa (WFP)” vizita ba Sentru Prosesamentu Masin Midar Ben hosi Bafo Kayrala ninia nira iha Bairo Oetulu, Aldeia Sanane, Suku Costa, Sub Região Pante Makasar, Região Administrativo Espesial Oecuse Ambeno (RAEOA).

Programa IX Governu Konstitusionál liu hosi Secretaria de Estado de Cooperativas (SECoop) nian Primeiru maka produz Bafo Kayrala sai fariña hafoin produz sai pão hodi fornese ba merenda eskolar, la’os atu produz deit, maibe hahú prosesu hosi hulu to’o hilirisasi, liu-liu iha prosesu hilirisasi ba to’o konsumedor sira, ida ne’e maka Secretaria de Estado sei tau atensaun maka’as. Bainhira prosesu hahú hosi hulu to’o hilirisasi maka la’o, fiar katak produtor sira no Kamponezes sira ne’ebé involve direita sei krése ekonomia familiar nian, hodi halo mudansa ba moris.

Entretantu prosesamentu Masin Midar hosi Bafo Kayrala ninia nira ne’e isiativa hosi Grupu Juventude hamutuk ema nain 8 maka halibur malu no asisténsia téknika hosi Funsionáríu destakadu iha Região Administrativo Espesial Oecuse Ambeno (RAEOA), Jacinta Sila.

Iha vizita ne’e Sua Eselénsia SECoop aprésia ho vontade hosi juventude sira nian, tanba hakarak halo mudansa ba moris tenki kria servisu ba aan rasik.
“Uluk Hau mai ne’e kuilleta deit Bafo Kayrala deit, maibe ohin loron hau mai halo prosesamentu ba masin midar ben hosi Bafo Kayrala ninia nira no ninia musan prosesa sai fariña hodi produz ba pão no produtu final sira seluk. Grupu prosesamentu ne’e hatudu progresu diak maibe hanesan Secretárío de Estado mai vizita direita atu nune’e bele hare sira ninia difikuldade sira ne’ebé hasoru, no saida maka ita bele fó apoiu sira ba iha futuru, tanba ita mos labele husik hanesan ne’e deit, buat ne’ebé maka halo prosesamentu sei halo manual, tradisional deit, no Ita konsidera hanesan matenek lokal” afirma SECoop.

Secretário de Estado de Cooperativas komprometidu katak sei fasilita Grupu refere, hodi ba tuir formasaun kona-ba prosesamentu Masin Midar nian inkluimos fasilita sira hodi transforma-aan sai kooperativa produsaun atu nune’e bele iha ninia sustentabilidade ba futuru.

Ikus liu Governante ne’e hatutan tan katak, sei kria kondisaun ba sira, liu-liu fatin ba prosesamentu atu nune’e labele apeita fali ba konsumedor sira nia saúde.

Iha tempu hanesan Xefe Grupu, José Amadeu fó agradese ba Sua Eselénia SECoop ninia vizita ba sira nia fatin, tanba liu hosi vizita ne’e, bele motiva diak liu tan sira, no mos husu atu fasilita formasaun no apóiu materiál inklui harii fatin ba prosesamentu nian.

Mídia SECoop