“Formasaun Kontabilidade Importante ba Sustentabilidade Dezenvolvimentu Movimemtu Cooperativa sira nian”
Liquiça, 22 Abril 204, Sua Eselénsia Secretário de Estado de Cooperativas (SECoop), Eng. Arsénio Pereira da Silva, M.Agr., loke formasaun Kontabilidade ba Movimentu Cooperativa Produsaun sira ne’ebé maka ejisti iha Munisípiu Liquiça.
Formasaun refere organiza hosi Direção Nacional de Polítika da Reforma e Kapasitação em Gestão de Cooperativas (DNPRKGC) ne’ebé maka sei hala’o durante semana ida nia laran hahú hosi loron 22 to’o 26 Abril tinan 2024, iha Salaun Sede Suku Maumeta, Postu Administrativu Bazartete, Munisípiu Liquiça.
Sua Eselénsia SECoop iha ninia intervensaun husu ba formandu sira atu aproveita didiak oportunidade formasaun refere hodi nune’e bele dezenvolve sira nian kooperativa ho diak ba futuru.
“Hau atu dehan deit katak, formasaun hanesan ne’e iha fatin seluk ne’e formandu sira tenki selu, maibe formasaun ida ne’e gratuita deit, ne’ebé oportunidade sira ne’e, ita tenki uza ho didiak, durante semana ida nia laran hodi nune’e bele aprende netik buat ruma, fila ba hadia ida-idak kooperativa hodi nune’e bele sustentabilidade ba futuru” afirma SECoop.
Secretário de Eatado de Cooperativas mos dezafia nafatin Movimentu Kooperativa sira, liu-liu Movimentu Kamponezes Timor-Leste (MOKATIL) atu hasa’e produsaun Agrikula iha rai laran hodi nune’e bele fornese ba merenda eskolar.
“Ohin hau reuniaun ho Prezidenti Autoridade Munisípiu (PAM) Liquiça, Nia afirma kakat MOKATIL maka sei fornese produtu lokal ba merenda eskolar, liu-liu Bafo Kayrala hamutuk ho produtu sira seluk, ne’ebé ita boot sira tenki produsaun halo barak liu tan” haktuir SECoop.
Ikus liu Governante ne’e husu ba funsionáriu SECoop destakadu sira atu tau matan ba movimentu Cooperatíva sira iha Munisípíu Liquiça hodi garantia sustentabilidade ba futuru.
Iha tempu hanesan Xefe Maumeta, Victor da Silva reforsa tan katak, iha fatin balun, atu hetan matenek tenki selu karun, bainhira boot sira laaprende ho didiak, laakompaña ho didiak formasaun ida ne’e, lakon matenek, lakon oportunidade, lakon osan no lakon tempu direta no indireita, ne’ebé husu ba formandu sira atu aproveita oportunidade ho diak.
Entretantu Movimentu Kooperativa ne’ebé partisipa formasaun ne’e, maka hanesan, Kooperativa CCCLN, Cooperativa Roman Nicolao Lobato Fahilebu, Budahanra, HAMORO, CPAC, LETIMOB, Nurak Sulimutuk, Hafena, MOKATIL no CMM hamutuk ema nain 30.
