SECoop, MOKATIL ho Parseria WFP Koilleta Bafo Kayrala Hektare rua iha Município Bobonaro

Maliana, 21 Abril 2024

Secretario de Estado de Cooperativas (SECoop) nebe reprezenta husi Diretor Geral Olderico Lopes Koilleta Bafo Kayrala iha rai hektare rua iha Aldeia Sekar, Posto Administrativo Maliana, Município Bobonaro.

Iha Serimonia Koilleta nebe organiza husi WFP (Word Food Program) hamutuk ho Koperativa Movimentu Kamponezes (MOKATIL), Diretor Geral Olderico Lopes nebe reprezenta Secretario de Estado Kooperativa hato’o iha ninia diskursu badak katak, WFP komesa halo ona diskusaun Teknika SECoop ho Objektivu atu, Oinsa mak atu bele servisu hamutuk no Sua Excelencia agradese tebes tanba Shorgum nee tama ona iha Menu Merenda Eskolar no ida nee hanesan previlezio boot ba ita hotu.

“Ami hein katak prosesu Memorandum Intendimentu nee komesa lao dadauk ona no ita bele halo lalais atu nunee produsaun hirak nee bele sai duni faktus ba iha rezultadu ida nebe mak diak ba ita nia povu no kontribuisaun dezenvolvimentu ekonomia rai ida nee nian”,Tenik Nia.

Iha fatin hanesan tuir Anita (Deputy Manager WFP Asia Pasipic) katak, Shorgum/Bafo Kayrala nee hanesan ai-horis ida nebe mak ami programa aihan mundial komesa tau atensaun teb-tebes tanba nia bele adapta ho klimatika iha rai nebe deit nunee mos bele integra ba nutrisaun. Konaba oinsa atu asesu ba merkaduria, WFP hamutuk ho governu fasilita oinsa atu buka solusaun nebe mak diak liu, no ida nee mak WFP nia aprosimasaun atu bele ajuda mos ba tos nain sira.

Aleinde ida nee, Presidente Autoridade Município Sr. Alexandre Pires, Lic.Eco, M.M, hato’o ninia resposta konaba preokupasaun husi populasaun hirak nebe mak sempre kestiona bebeik konaba merkaduria ba produtus Shorgum nee rasik.

Tuir Sr. Alexandre katak nudar Presidente Autoridade Município iha obrigasaun atu buka solusaun hamutuk ho SECoop. Alende nee, alerta ona mos katak atu redus mal Nutrisaun nebe mak iha 47% iha Mundial nee presiza redus liu husi Shorgum, tanba nia iha kandungan oi-oin nebe mak iha Nutrisaun nebe diak hodi bele kombate ba Mal nutrisaun nebe mak Timor-Leste infrenta. Tanba nee liu husi Politika Governu, liu husi Ministeriu Edukasaun ho SECoop nian kada tinan sempre tau osan ba Merenda Eskolar nian nebe mak boot ho motante 2 Milliaun. No tuir PAM, ida nee sufisiente hodi loke merkaduria hodi responde ba produtu Shorgum nian. Liu husi ida nee mak bele responde ba kresimentu ekonomia rai laran, liu-liu iha Municipo Bobonaro. Tanba nee mak nia alerta ba Populasaun hotu hodi kria grupo no kuda Shorgum atu nunee osan hirak nebe mak governu tau ba Merenda eskolar nee bele fila fali ba ita se lae, osan hirak nee bele sai ba liur tanba ita laiha produtu atu hola ba Merenda eskolar.

PAM rasik mos deklara-an hodi sai komandante ba kombate Mal Nutrisaun iha Município Bobonaro, no nia pronto atu kolabora hamutuk ho Diretor Agrikultura Município Bobonaro nian hodi fasilita Traktor ba Populasaun nebe mak hakarak harii grupo hodi kuda Shorgum,”Taka Nia.

Prezenta iha Serimonia Koilleta hetan partisipasaun husi populasaun, ekipa Diretor Geral nebe akompanha husi Asesor Tekniku, Sr. Estanislau Claudino Ximenes, Diretor Nasional Planiamentu Integrado ba Produsaun no Gestaun, Sr. Higino Barros, Presidente Autoridade Município Bobonaro Sr. Alexandre Pires, Lic.Eco, M.M no Ekipa husi WFP.

Depois remata Koilleta, iha mos diskusaun aberta hodi troka hanoin ba malu entre populasaun, SECoop, PAM ho parseria WFP.

#Média_SECoop