Railako, 19 Abril 2024, Sua Eselénsia Secretário de Estado de Cooperativas (SECoop), Eng. Arsénio Pereira da Silva, M.Agr., hala’o enseramentu ba formasaun téknika iha área Integridade, Inspkesaun, Auditória no Investigasaun, iha Salaun NCBA-CCT Railako.

Formador sira mai hosi liña ministeriál sira hanesan, Komisaun Anti Korupsaun (KAK), Komisaun Funsaun Públika (KFP), Provedor Dereitus Humanus no Justisa (PDHJ) no Ministériu Finansas (MF).

Sua Eselénsia SECoop iha ninia intervensaun husu formandu sira atu aproveita didiak oportunidade ne’e, atu nune’e bele implementa iha ida-idak ninia diresaun.
“Hau fó parabens ba ita boot sira, no husu atu hatutan tan materia sira ne’ebe durante semana ida hetan iha formasaun ida ne’e, espera katak bele hatutan fali ba maluk sira seluk, iha ida-idak ninia diresaun ka munisípiu sira” afirma SECoop.

Governante ne’e nafatin ekoraja funsionáriu sira hodi aprende lingua ingles no lingua sira seluk hodi nune’e labele lakon oportunidade bainhira formasaun sira ba liur no rai laran.

Iha tempu hanesan, GIA, Gaspar Policarpo Coreia, fó agradese ba parte hotu-hotu ninia apóiu hodi finaliza formasaun refere ho susesu, liu-liu Secretário de Estado de Cooperativas, Diretor Geral SECoop no diresaun sira hotu, no husu atu bele iha kontinuasaun formasaun hanesan ne’e ba futuru hodi nune’e mellora diak liu tan formandu sira nia kapasidade.

Entretantu Formandu sira ne’ebé maka tuir formasaun durante semana ida hahú hosi loron 12 to’o 19 Fulan Abril Tinan 2024 ne’e hamutuk ema nain 63 kompostu hosi feto ema nain 28 no mane 35, reprezentante hosi kada diresaun ámbitu SECoop nian inkui mos reprezentante hosi Munisípiu Ermera, Likisa, Lautem no Aileu.

Prezensa iha seremónia ne’e maka hanesan, Komisáriu Komisaun Protopoliu Asuntu Displiñar, Agapito da Conceição, Diretór Getal SECoop, Eng. Olderico Lopes, Inspektora KFP, Xefe Gabinete SECoop, Eng. Leovogildo Belarmino, M.Sc., Diretor CCT no Funsionáriu sira.

Mídia SECoop