SECoop hamutuk ho PAM Manufahi halo Lansamentu kuda Bafo Kayrala hektares tolu iha Akaderuhun-Same.
Same, 26 Marsu 2024; Sua Eselénsia Secretário de Estado de Cooperatuvas (SECoop), Eng. Arsénio Pereira da Silva, M.Agr., hamutuk ho Prezidenti Autoridade Munisípiu (PAM) Manufahi, Luis Marçal da Costa Tavares kontinua hala’o lansamentu kuda Bafo Kayrala hamutuk hektares tolu iha área Akaderuhun, Aldeia Rialau, Suku Letefoho, Postu Administrativu Same, Munisípiu Manufahi.
Polítika IX Governu Konstitusionál nian liu hosi Secretaria de Estado de Cooperativas nian ne’ebé maka aprova iha Parlamentu Nasionál ba Tinan lima nian maka programa importante hamutuk hitu, maibe foka liu ba Cooperativas Produsaun Agrikula, ho ninia produtu prima maka Bafo Kayrala maibe integradu ho produtu sira.
Hafoin lansamentu kuda Bafo Kayrala Sua Eselénsia SECoop iha ninia intervensaun enkoraja nafatin ba kamponezes sira atu kontinua Produz halo barak liu tan, iha rai produtu sira ne’ebé maka abandonadu iha laran hodi nune’e bele fornese ba merenda eskolar.
“Hau fó parabens Grupu Produsaun Butisiba ne’ebé maka iha inisiativa rasik halibur hodi prepara rai to’o kuda, husu ba Produtor no kamponezes sira atu labele depende ba individu ka pesoál ida ne’ebé momentu asume kargu hanesan Secretário de Estado maibe ne’e tenki iha kontinuasaun tanba hotu-hotu ne’ebé maka Governu implementa ne’e diak ba povu nia moris” afirma SECoop.
Secretário de Estado de Cooperativas haktuir tan katak, grupu sira ne’ebé maka agora dadaun ejisti hala’o atividade produsaun agrikula inklui atividade ekonómikus sira seluk diak liu, atu transforma sai kooperativa hodi nune’e bele iha ninia sustentabilidade ba futuru, tanba bainhira sai ona kooperativa iha ninia estatutu, rejimentu no estrutura hodi nune’e bele regulariza.
Ikus liu Governante fó mensajen ba movimentu kooperativas iha teritóriu laran tomak katak, ramos kooperativas hotu-hotu atu dezenvolve-aan nafatin, karik buat ruma presiza husu apóiu parte Governu nian, liu-liu Secretário de Estado de Cooperativas nian prontu nafatin fó apoiu no fasilita tuir kbiit Secretaria de Estado nian.
Iha tempu hanesan Prezidenti Butisiba, Atipo de Araújo fo agradese ba Sua Eselénsia Secretário de Estado de Cooperativas ho PAM Manufahi ninia prezensa hodi halo lansamentu kuda Bafo Kayrala, maibe dirijenti Grupu ne’emos husu ba SECoop atu asisténsia tékniku nafatin ba sira to’o Bafo Kayrala kuilleta.
Entretantu rai ne’ebé maka agora dadaun identifikadu atu halo kuda Bafo Kayrala hamutuk hemtares 5000 resin, kuda ona hamutuk hektares 1000 resin, no Bafo ne’ebé maka kuilleta ona hamutuk tonelada 50 resin.
Prezensa iha seremónia ne’e maka hanesan, Segunda Komandante PNTL Munisípiu Manufahi, Reprezentante WFP, reprezentante ministériu agrikultura, reprezentante ministériu edukasaun, Asesor Tékniku, Estanislau Claudio Ximenes inklui funsionariu sira.
#Mídia SECoop#
