SECoop hala’o Reuniaun Koordenasaun Servisu ho BCTL.

Díli, 27 Marsu 2024; Sua Eselénsia Secretário de Estado de Cooperativas (SECoop), Eng. Arsénio Pereira da Silva, M.Agr., akompaña hosi Diretór Geral SECoop, Eng. Olderico Lopes, Xefe Gabinete SECoop, Eng. Leovogildo Belarmino, M.Sc., no asesor Júridiku, Aquino Dias hala’o reuniaun Koordenasaun servisu ho Governador Banku Central (BCTL), Helder Lopes ho ninia ekipa iha Sala reuniaun BCTL nian.

Iha reuniaun ne’e, ko’alia kona-ba asuntu importante tolu maka hanesan, dahuluk ko’alia kona-ba BCTL no SECoop sei halo estabelesementu kooperasaun, hodi asiste dezenvolvimentu kooperativa sira nian iha rai laran, daruak BCTL ho SECoop servisu hamutuk hodi halo monitorizasun, superviziona ba kooperativa sira ne’ebé ejisti iha teritóriu laran tomak, liu-liu ba kooperativa kréditu union nian no dalatoluk maka BCTL servisu hamutuk ho SECoop hodi fasilita formasaun literasia ba kooperativa sira atu nune’e membru sira bele hetan benefísiu diak.

Hafoin reuniaun Governador BCTL, Helder Lopes hateten katak BCTL bele servisu hamutuk ho SECoop hodi halo akompañamentu, monitorizasaun no superviziona ba kooperativa kréditu union tanba numeru kooperativa no kapital mos aumenta ba bei-beik, prezisa monitoriza no superviziona sira nia atividade atu nune’e bele iha ninia sustentabilidade ba futuru.

Iha tempu hanesan mos Sua Eselénsia SECoop, Eng. Arsénio Pereira da Silva, M.Agr., relata katak ekipa téknika sira sei halo revizaun ba akordu ne’ebé maka antes ne’e asina ona, hodi nune’e bele aliña ho programa Secretaria de Estado de Cooperativas iha IX Governu konstitusiomál nian,  lliu-liu fasilita formasaun ba kooperativa sira no espera katak iha loron 11 Abril bele estabelese ona asina akordu foun.

#Mídia SECoop#