SECoop hala’o Lansamentu Kuda Abokate Hektar ida iha Manelima.
Laklubar, 25 Marsu 2024; Sua Eselénsia Secretário de Estado de Cooperativas (SECoop), Eng. Arsénio Pereiera da Silva, M.Agr hamutuk ho Xefe Gabinete Prezidenti Autoridade Munisípiu Manufahi, Henrique Soekendro, Komandante PNTL Eskuadra Postu Administrativu Laklubar, Asesor Téknika, Estanislau Claudio Ximenes, xefe suku no xefa aldeia sira, inklui kamponezes sira hala’o lasamemtu kuda abokate iha Suku Manelima, Postu Administrativu Laklubar, Munisípiu Manatuto.
Sua Eselénsia SECoop iha ninia diskursu fó agradese tebes ba toos nain no MOKATIL hanesan parseiru konvida Nia, hodi mai halo lanamentu kuda abokate iha área refere, produtu saida deit maka produtor sira produz, SECoop prontu nafatin atu apoiu, fasilita, regula no hasa’e ninia produsaun haree liu ba kualidade no kuantidade hodi nune’e lori ba merkadu.
Programa kuda abokate ne’e, orientasaun mai hosi Sua Eselénsia Primeiru Ministru (PM), Maun Bo’ot Kay Rala Xanana Gusmão, kuandu halo aprezentasaun Orsementu Geral Estado 2024 nian, ba iha Komisaun Revizaun Orsmental, Ministériu Finansas.
“Iha momentu ne’ebá Sua Eselénsia Primeiru Ministru (PM) temi kedan katak iha Lakubar abokate barak iha ne’eba, sebele ekipa téknika sira hosi Secretaria de Estado de Cooperativas nian bele fasilita Kooperativa no kamponezes sira iha área ne’ebá hodi nune’e bele halo produz ho diak. Etapa ida ohin ne’e ita kuda ona abokate, maibe Hau hanoin fulan oin mai, ekipa peskiza sira ida sei servisu hamutuk ho Ministériu Agrikultura, Peskas, Pekuáríu no Floresta mai hodi halo peskiza ba kondisaun rai nian, atu nune’e bele hatene kontiudu rai ne’e bele kuda abokate duni ga lae” afirma SECoop.
Tanba agora dadaun merenda eskolar ninia orsamentu desentraliza hotu iha Prezidente Autoridade Munisipal no munisípiu sira, programa merenda eskolar ne’e, tenki fornese produtu lokal, kona-ba aifuan ida maka abokate ona, entaun ninia merkadu ida maka ne’e, kona-ba merkadu ida maka ne’e no mekadu seluk konsumu ba aan rasik.
“Ohin ita kuda ne’e hekfares ida deit, maibe ba oin, hau hanoin kuda kontinua ba fatin potensialidade sira seluk ne’ebé maka sei abadona hela, bainhira abokate komesa bo’ot ona, bele kuda mos produtu sira seluk hanesan, ainanas, kafé, ho produtu sira seluk” Hatutan Nia.
Governante ne’e mos komprometidu katak hanesan Secretário de Estado de Cooperativas iha IX Governu Konstitusionál ida ne’e, durante Nia mandatu, saida-saida maka produz sei responsabiliza, maibe tenki produz ho kuantidade bo’ot no kualidade diak, parte Governu maka sei responsabiliza, regulariza no apoiu hodi nune’e bele to’o iha merkadu tanba intensaun ba atividade no programa saida deit Governu halo ho objetivu oinsa maka atu hasa’e krésimentu ekonomia povu nian liu hosi rendimentu no produtu sira ne’ebé maka produz.
Iha tempu hanesan Xefe Gabinete Autoridade Munisípiu Manatuto, Henrique Soekendro senti kontenti no agradese ba Sua Eselénsia SECoop nian vizita ba fatin refere, husu atu kontinua kuda ba fatin produtivu sira ne’ebé maka sei abandona hela.
Entretantu rai ne’ebé maka halo lansamentu kuda abokate hamutuk hektares ida resin no abokate oan hamutuk atus lima resin.
#Mídia SECoop#
