SECoop Kontinua Hala’o Lansamentu Kuda Bafo Kayrala no husik Fini Ikan iha Bauduku-Remixio.

Remixio, 18 Marsu 2024, Sua Eselénsian Secretário de Estado de Cooperativas (SECoop), Eng. Arsénio Pereira da Silva, M.Agr hamutuk ho Xefe Fadabloko nomos kamponezes sira sira hala’o lansamentu ba husik Fini ikan ba kolam no kuda Bafo Kayrala hektares ida resin ne’ebé hala’o hosi Grupu Hasa’e Produsaun Ekonomia Familia HPEF) iha área Bauduku, Aldeia Rileu, Suku Fadbloko, Postu Administrativu Remixio, Munisípiu Aileu.

Sua Eselénsia SECoop hateten katak Secretaria de Estado de Cooperativas kontinua nafatin ninia programa sira ne’ebé maka aprova ona iha Parlamentu Nasionál ba Tinan nia laran, maka foka liu ba Cooperativa Produsaun ho ninia programa prima Bafo Kayrala, inklui mos produtu sira seluk, hanesan, baniben, susuben, mina kami, mina nu no selu-seluk tan.

“Hau fó agradese ba Grupu Hasa’e Produsaun Ekonomia Familia (HPEF) iha inisiativa rasik hodi halibur malu hala’o atividade produsaun agrikula, liu-liu hakiak ikan no kuda bafo kayrala hektares ida resin”, afirma SECoop.

Governante ne’e mos husu ba HPEF haboot tan sira nian atividade produsaun agrikula, maibe Grupu labele hela grupu deit maibe tenki transforma-aan sai Cooperativa tuir dekretu lei ne’ebé maka iha.  Parte téknika sira hosi Secretaria de Estado de Cooperativas prontu nafatin fasilita fó formasaun hodi sai pra Cooperativa hafoin sai Cooperativa primaria, hodi nune’e bele iha ninia sustentabilidade ba futuru no ema hotu sai nain.

Iha tempu hanesan Xefe Suku Fadabloko, Lito da Costa Mendonça fó agradese ba Sua Eselénsia SECoop ninia prezensa iha ninia Suku, liu iha Aldeia Rileu, husu mos ba kamponezes sira atu Produz nafatin no serrvisu maka’as hasa’e Produzaun rai laran hodi nune’e bele hamenus sasan importasaun hosi Rai liur.

Enkuantu iha Aldeia Rileu pópulasaun hamutuk ema nain 600 resin, maória hala’o vida agrikutór, hodi halo to’os, Natar, hakiak, ikan no selu-seluk tan.

Hafoin remata kuda Bafo Kayrala no husik Fini ikan kontinua kedan hala’o dialógu ho komunidade sira hodi rona rekomendasaun no difikuldade sira ne’ebé hasoru iha baze.

Prezensa seremónia ne’e maka hanesan, Komandante PNTL Eskuadra Remixio, Jestor CU LIikore, Xefe Aldeia Rileu, Prezidenti MOKATIL Munisípiu Aileu, Prezidente Grupu HPEF, Agostino de Jesus no Funsionáriu sira Munisípiu Aileu nian.

#Mídia SECoop#.