SECOOP Inagura Sede Coperativa POLCOM iha Lautem.
Díli, Domingu, 27 Marsu 2022.
Secretário de Estado de Cooperativas ( SECOOP), Dr. Elizário Ferreira, MM akompaña husi Komandante PNTL Munisípiu Lautem, Superintendenti Polisia, António Regô Fernandes inagura Sede Cooperativa Multi-Sektoriál Cooperativa Polisia Comunidade (POLCOM) nian, iha ámbitu Selebrasaun aniversáriu PNTL Ba dala XXII iha Lautem.
Iha inagurasaun ne’e SECOOP hateten katak Cooperativa POLCOM Munisipíu Lautem sai hanesan referensia ida ba PNTL iha munisípiu sira seluk.
“Hau sei hamriik nafatin iha POLCOM nia kotuk hodi reforsa no promove Cooperativa atu bele asegura sustentabilidade institusionál no finanseiru, nune’e evita membru PNTL sira deve osan iha liur. Afirma SECOOP.
Governante ne’e mos hatutan liu tan katak Cooperativa POLCOM hanesan Cooperativa komérsiu ida espesífiku ba membru PNTL no ba komunidade sira. Husu ba membru Cooperativa sira tenki loke aan hodi dada tan membru família sira iha uma laran nomos ema seluk atu invole aan Cooperativa refere, tanba Cooperativa ne’e ninia baze mak membru.
Iha tempu hanesan Komandante PNTL Munisípiu Lautem, Superintendenti Polisia, António Regô Fernandes, hateten objektivu harii Cooperativa POLCOM ne’e mak atu hakmaan ekonómia família membru PNTL sira nian nomos komunidade sira nian.
Partisipa iha seremónia ne’e mak hanesan, Administrador Munisípiu Lautem, Reprezentante Veteranus, xefe suku no xefe aldeia sira, nomos komunidade sira.
