SECOOP Sai Sasin Ba Seremónia Pose Estrutura Cooperativa MBA nian.

Díli, 08 Febreiru 2022.

Secretário de Estado de Cooperativas (SECOOP), Dr. Elizário Ferreira, MM hamutuk ho Reitór UNTL, Prof. João Soares Martins asiste seremónia pose ba Estrutura Cooperativa Multi-Sektoriál Brilla Akademika (MBA) ne’ebé hamahon aan iha Universidade Nasionál Timor Lorosa’e, iha Salaun Fundasaun  Oriente.

Antes Estrutura Cooperativa simu pose, parte formadór sira husi SECOOP fó uluk formasaun bázika kona-ba lala’ok cooperativas nian ba dirijente no membru inisiadór sira.

Secretário de Estado de Cooperativas (SECOOP), Dr. Elizário Ferreira, MM iha ninia intervensaun hateten cooperativa MBA sei sai ponténsia bo’ot iha nível Komunidade Akadémika universidade Nasionál Timor Lorosa’e (UNTL) nian.

“Vantajen Kooperativa iha universidade, primeiru ita haree ba poténsia boot tanba iha estudante ne’ebé rihun ba rihun mak eskola iha UNTL no potensiál boot tanba ema barak mak sai ona alumni iha UNTL inklui ha’u entaun ne’e poténsia”, hatete SECOOP.

Governante ne’e mos hatutan liu tan katak Insitituisaun Universidade Nasionál Timor Lorosa’e bele sai mahon ba cooperativa maibé labele na’in ba Cooperativa ba Brilla Akadémika ne’e rasik. Maibé husu ba estrutura sira tenke bandinas halo servisu ne’ebé di’ak iha setór kooperativa nian iha Universidade nian.

Iha tempu hanesan Reitór Universidade Nasionál Timor Lorosa’e (UNTL), João Soares Martins, husu ba estrutura Cooperativa atu nafatin iha Espíritu hodi dezenvolve cooperativa Brilla Akadémika ne’e rasik.

“Normalmente ita kuandu diskute de’it ne’e difísil atu realiza, maibé ohin to’o ona mai etapa ida ne’e susesu bo’ot, espera katak, espíritu ida ne’e kontinua nafatin, nune’e ita-nia kooperativa ne’e bele buras no hala’o nia funsaun hanesan ita hotu-hotu hakarak”, dehan nia.

Nune’e mos Prezidente Cooperativa MBA, Clarina David Lopes hatete, Kooperativa Brilla Akadémika hari’i ba kbi’it la’ek estudante no komunidade iha UNTL atu fasilita sira iha área negósiu nian.

“Cooperativa ne’e hari’i ba kbi’it la’ek sira hodi tau osan oituan halo negósiu ba moris loroloron nian, la siknifika katak, ema riku mós hari’i Cooperativa maibé iha ami-nia haree ba ema kbi’it laek sira”, afirma nia.

Dirijente Cooperativa ne’e mós rekomenda ba SECOOOP atu kontinua fó apóiu ba formasaun kontinuidade, liu-liu kona-ba área kontabilidade nian hodi bele eleva liu tan kapasidade no kuiñesementu estrutura no membru sira nian.

Enkuantu Cooperativa Multisetoral Brilla Akadémika hahú ho nia membru inisiál hamutuk ema nain 35 ne’ebé mai husi fakuldade Edukasaun, Ekonomia, no Agrikultura, iha

Universidade Nasionál Timór Lorosa’e.