SECOOP Inagura Sede Sukursal CU LANAMONA Nian iha Díli.
Díli, Sábadu, 18 Dezembru 2021.
Secretário De Estado de Cooperativas (SECOOP), Dr. Elizário Ferreira, MM akompaña hosi Prezidenti Federasaun Hanai Malu Interinu, João Belo nomos dirijenti cooperativa sira inagura Sede Sukursal Cooperativa Créditu Uniaun Lakon Nakukun Mosu Naroman (CU LANAMONA) nian iha Díli.
Iha Inagurasaun ne’e SECOOP fó parabens no aprésia ba dirijenti no membru Cooperativa nian bele harii Sede ida ho andar tolu hodi nune’e bele atende membru sira ho dignu.
“Cooperativa ne’e ninia base mak membru sira tanba ne’e maka lema cooperativa nian, Ita Nia Cooperativa, Ita Nia Dignidade, no Ita Nia Futuru”. Afirma SECOOP.
Governante ne’e mós hatutan liu tan katak iha tempu besik Konsellu Ministru sei aprova lei Ha’at (4), lei ida ba créditu uniaun, lei ba cooperativa produsaun, lei ba cooperativa comérsiu, no lei ida cooperativa Agro no Peskas, sei halo revizaun no alterasaun mós ba decretu lei nomor 16, kona-ba kódiku cooperativa nian. Atu lori cooperativa sira hotu ba rejistu iha notariadu, SERVE, foti sertidaun dívida no TIN iha Ministériu Finansas.
Iha Parte Seluk Prezidenti Hanai Malu, João Belo mós farabens ba CU LANAMONA tanba bele iha ona edifisiu ho dignu, no husu atu konitnua servisu maka’as liu tan hodi kontribui ba kresimentu ekonomia rai laran.
“Hau ba cooperativa sira seluk ne’ebé mak ejisti nanis iha Díli ona labele nakdoko ho prezensa CU LANAMONA nian, nafatin hala’o funsaun hanesan bai-bain” Subliña Nia.
Iha tempu hanesan Prezidenti CU LANAMONA, Domingas dos Santos afirma katak estabele CU nian Sukursal iha Díli tanba durante ne’e sira difisil atu rai no foti osan iha CU LANAMONA Maliana nian.
“Sukursal ida ne’e atu bele fasilita diak liu tan membru sira iha Comoro, Díli nian, total membru iha Díli hamutuk ema nain 161, kompostu hosi feto ema nain 85, no mane 76” Afirma Nia.
Aktual Deputada iha Parlamentu Nasionál ne’e mós hatutan liu tan katak CU LANOMA iha Mehi bo’ot atu ba futuru bele sai banku hodi atende membru ho diak liu tan, nomos sei loke liras to’o munisípiu sira hotu iha teritóriu laran tomak.
Enkuantu Edifísiu ne’e hahú hala’o konstrusaun iha tinan 2015 to’o finaliza osan konstruksaun hamutuk rihun 60 resin, osan hirak ne’e mai hosi CU LANAMONA rasik, Ajuda hosi Secretaria de Estado de Cooperativas, no kontribuisaun hosi membru sira nian.
