SECOOP Simbolikamente Fahe Cesta Básica Ba Komunidade Aelebere
Ilomar: Sekretáriu Estadu Kooperativas (SECOOP), Dr. Elizário Ferreira, MM hala’o simbolikamente fahe Cesta Básica ba komunidade sira iha Suku Aelebere, Postu Administrativu Ilomar Munisípiu Lautem, iha Loron Tersa-Feira (19/01/2021).
Postu Administrativu iha suku neen (6), ho populasaun hamutuk ema nain rihun sanulu resin ida, enkuantu Suku Aelebere, kompostu husi Aldeia Leilor, Marafal, Lalumatu, Heital, ho ninia popusaun hamutuk ema nain 1.832 maka sei benefísia ba Programa Cesta Básika.
Sekretáriu Estadu Kooperativa Elizário Ferreira, MM, iha ninia intervensaun hateten, programa Cesta Básika hanesa meus insentiva ida atu motiva agrikultór sira produs barak liu tan.
“Ita hotu hatene katak durante ne’e Nasaun hasoru krize oin-oin, to’o agora surtu pandemia covid-19 kontinua la’o no ita lahatene to’o bainhira maka atu termina, ho situasaun hirak ne’e maka Governu VIII (da Ualu) hala’o polítika fahe ai-han ba ema hotu liu husi Programa Rekuperasaun Ekonómika, Distribuisaun Cesta Básica.
Ita hotu hatene Distribuisaun Cesta Básica ne’e sei la responde ekonomia familiar, maibe ida ne’e atu hakmaan netik preokupasaun no nesesidade uma laran ba loron ida-rua nian”Afirma SECOOP.
Governante ne’e mós hatutan katak Sekretaria Estadu Kooperativas difini ona planu no programa merkadu ba produtór sira iha futuru, wainhira Cesta Básica remata.
” Polítika Sekretaria Estadu nian maka oinsa ba futuru sei kria merkadu ba produtór sira, tanba liu husi Cesta Básica, Governu hola komunidade sira nia produtu, ne’ebé ba oin konserteja komunidade sira iha ona inisiativa produz barak liu tan. Ho ida ne’e maka SECOOP sei ko’alia iha liña Ministerial hanesan Edukasaun, Saúde, Defeza, Interior, no Justisa atu nune’e, komunidade sira nia produtu bele inklui iha merenda eskolar, han ba pasiente sira iha hospital” Hatutan SECOOP.
Alende ida ne’e komunidade Ailebere, Adolfo de Jesus nia parte sente kontente tanba maske governo fó uituan maibé la haluhan, fó apoiu ba nia povu iha situasaun Covid-19.
Iha tempu hanesan Xefe Suku Aelebere, Libernito Gomes kongratula no senté orgullu ba governu, tanba bele fahe Cesta Básica maske uituan, maibé, ne’e hanesan dalan ida, governu tau matan ba nia povo iha situasaun pandenia covid-19.
“Estadu nia Prontu ida ne’e, ami orgullu, ami kontente, tanba ne’e, ha’u laiha dúvida, iha garantia katak ha’u nia komunidade sei simu ho diak, sasan sira ne’ebé Estadu ida ne’e, fahe ho susesu”.
