SECOOP Fó Pose Ba Estrutura CU-ROHALIK Nia iha Gleno.
3 years ago
Ermera: Iha Loron 09 Fulan Outubru 2021, Secretário de Estado de Cooperativas (SECOOP), Dr. Elizário Ferreira, MM fó pose ba estrutura Créditu Uniaun Rai Osan Hamutuk Liberta Kiak (CU-ROHALIK), iha edifísiu ETCI Gleno, Munisípíu Ermera.
CU-ROHALIK inísia hosi dosente East Timor Coffee Institutu (ETCI) nian hamutuk ema nain lima maka tau ideia hamutuk hafoin konvida tan maluk sira seluk, ikus mai Secretaria de Estado Cooperativas fasilita formasaun bazika kona-ba cooperativas nian durante semana ida nia laran, hodi nune’e sai hanesan cooperativa finanseira ida.
Iha seremónia pose ne’e Secretário de Estado de Cooperativa husu ba Estrutura CU-ROHALIK atu buka aprende ho cooperativa sira seluk ne’ebé maka ejisti uluk ona, atu bele dezenvolve-an diak liu tan.
“Hau fó parabens ba estrutura CU ROHALIK ninia, agradese mos ba estrutura reitória ETCI nian, bele hamoris cooperativa finanseira ida, husu ba parte hotu-hotu atu involve an iha cooperativa, tanba cooperativa créditu uniaun mosu atu fó solusaun ba problema sosiál, kultura, ekonómia, ne’ebé maka iha sosiadade tomak nian” afirma SECOOP
Governante ne’e mós hatutan tan dirijenti CU sira, liu-liu komite edukasaun ne’e tenki hetan bei-beik edukasaun atu forma ninia membru sira, aktualiza-an ho dezenvolve merkadu nian.
Ikus liu SECOOP kompromete katak parte hosi Secretaria de Estado de Cooperativas kontinua fasilita formasaun, no edukasaun ba dirijenti cooperativas liu-liu kona-ba kontabilidade nian, husu dirijenti cooperativas labele hanoin dezafiu ne’e sai obstaklu ida, maibe dezafiu hanesan oportunidade ida hodi hakat ba oin.
Iha tempu Magnifiku Reitór ETCI, Lucio Baros senti kontenti tanba estabelesimentu CU ROHALIK ne’e hanesan grasa bo’ot ida, no istória ida ba Munisípiu Ermera. Husu mós ba estrutura CU nian atu servisu maka’as liu tan hodi lori ba oin, labele halo iha dala klaran.
Nune’e mós Prezidenti Auroridade Munisípiu Ermera, Eusebio Salsinha afirma katak prezensa cooperativas bele ajuda komunidade sira nia uma laran iha Munisípiu Ermera hodi bele hamenus dependénsia ba rai liur.
Prezidenti CU-ROHALIK, Mario Madeira Soares konsidera cooperativa maka xave ba dezenvolvimentu ekonomia família nian, hodi nune’e husu ba parte Secretaria de Estado de Cooperativas atu kontinua akompañamentu no fó formasaun kona-ba kontabilidade ninia to’o cooperativa hamriik mesak, tuir prinsípiu, valores cooperativa nian.
