SECOOP Loke Formasaun Bázika Kona-ba Lala’ok Cooperativa nian Ba CU BALIMA iha Liquiça.
Liquiça, Tersa-Feira, 14 Dezembru 2021.
Secretário de Estado de Cooperativas (SECOOP), Dr. Elizário Ferreira, MM Loke formasaun bázika kona-ba lala’ok cooperativa nian ba Cooperativa Créditu Uniaun Bazartete Liquiça Maubara (CU BALIMA) nian.
SECOOP fó apresiasaun ba inisiativa membru inisiadór sira, maibe mós kontinua dezafia sira, atu labele mate iha dalan klaran, no Cooperativa ne’e tenki iha ninia sustentablidade ba futuru, sai hanesan pilar importante ida ba hasa’e kresimentu ekonómia família ka uma kain nian.
“Créditu Uniaun ne’e moris, la’os atu husu osan, maibe faan no sosa osan, Créditu Uniaun ninia baze maka membru sira, hodi nune’e tenki asegura ninia membru sira. Ba dirijenti cooperativa sira atu labele depende bei-beik ba ema seluk maibe tenki hamriik iha nia ain rasik”. afirma SECOOP
Governante subliña liu tan katak, save atu cooperativa la’o ba oin dirijnti sira tenki iha honestidade, humildade, atendimentu sira tenki ho simplesidade.
“Total cooperativa créditu uniaun iha teritóriu laran tomak hamutuk 150, kobre ona postu administrativu 53” Subliña Nia.
Ikus liu Eis Deputadu ne’e husu ba Estrutura CU BALIMA atu rejistu iha notariadu no rejistu sai membru Federasaun Hanai Malu hodi nune’e bele asesu imprestimu hosi ne’eba.
Iha tempu hanesan Administradór Munisípiu Liquiça, Pedro Paulo Gomes husu ba membru CU BALIMA sira atu tenki aproveita didiak formasaun ne’e.
Nune’e mós Prezidenti Interinu CU BALIMA, Francelina Maria Amelia, senti kontenti bele hetan oportunidade parte formadór sira hosi Secretaria de Estado de Cooperativas fasilita formasaun bázika kona-ba lala’ok cooperativas nian. Ba futuru tenki fasilita nafatin formasaun kontinuasaun liu-liu kona-ba kontabilidade, administrasaun, no finansasa.
Enkuantu CU BALIMA harii iha fulan 4 ba kotuk, to’o agora iha ona membru hamutuk ema nain 49, kompostu hosi mane 21, no feto 28, ho kapital hamutuk osan $ 2000.
#Mídia SECOOP#
